Дар Санкт-Петербург масъалаи ҳифзи ҳуқуқу манфиатҳои шаҳрвандони Тоҷикистон дар Русия баррасӣ шуд

Июнь 10, 2024 18:50

ДУШАНБЕ, 10.06.2024. /АМИТ «Ховар»/. 6 июни соли 2024 дар ҳошияи баргузории Форуми байналмилалии иқтисодии Санкт-Петербург ҷаласаи 7-уми Гурӯҳи корӣ оид ба татбиқи Созишнома дар бораи ҷалби муташаккилонаи шаҳрвандони Ҷумҳурии Тоҷикистон ба фаъолияти меҳнатии муваққатӣ дар қаламрави Федератсияи Русия баргузор шуд, ки дар он масъалаи ҳифзи ҳуқуқу манфиатҳои шаҳрвандони Тоҷикистон дар Русия баррасӣ гардид. Дар ин хусус ба АМИТ «Ховар» дар Вазорати меҳнат, муҳоҷират ва шуғли аҳолии ҷумҳурӣ хабар доданд.

Қисмати тоҷикистонии гурӯҳи корӣ аз ҳисоби намояндагони вазоратҳои тандурустӣ ва ҳифзи иҷтимоии аҳолӣ, корҳои хориҷӣ ва корҳои дохилӣ таҳти роҳбарии муовини Вазири меҳнат, муҳоҷират ва шуғли аҳолии Ҷумҳурии Тоҷикистон Шаҳноза Нодирӣ ба шаҳри Санкт-Петербурги Федератсияи Русия равон гардид.

Дар доираи ҷаласаи гурӯҳи корӣ масъалаҳои амалишавии Созишнома дар бораи ҷалби муташаккилонаи шаҳрвандони Ҷумҳурии Тоҷикистон ба фаъолияти меҳнатии муваққатӣ дар қаламрави Федератсияи Русия, иҷрои муқаррароти ҷаласаи 6-уми гурӯҳи корӣ, лоиҳаи Протокол оид ба ворид намудани тағйиру иловаҳо ба ин созишнома, омода намудани ҳуҷҷатҳои пеш аз сафар, аз ҷумла гузаштани ташхиси тиббӣ ва гирифтани шаҳодатномаи донистани забони русӣ, таърих ва қонунгузории Федератсияи Русия мавриди муҳокима қарор гирифт.

Бо назардошти иқомати аксари муҳоҷирони меҳнатӣ дар қаламрави Русия масъалаи ба танзим даровардани раванди муҳоҷирати меҳнатӣ, инчунин ҳифзи ҳуқуқу манфиатҳои шаҳрвандони Тоҷикистон дар Русия аз мавзуъҳои калидии музокироту гуфтушунидҳо байни мақомоти дахлдори Ҷумҳурии Тоҷикистон ва Федератсияи Русия мебошад.

Аз соли 2019 Созишнома байни Ҳукумати Ҷумҳурии Тоҷикистон ва Ҳукумати Федератсияи Русия дар бораи ҷалби муташаккилонаи шаҳрвандони Ҷумҳурии Тоҷикистон ба фаъолияти меҳнатии муваққатӣ дар қаламрави Федератсияи Русия мавриди амал қарор дорад.

Дар охир ҷонибҳо баҳри таҳкими пайвастаи ҳамкорӣ дар самтҳои гуфташуда ва рушди муносибатҳои дуҷониба изҳори омодагӣ намуданд.

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон

Июнь 10, 2024 18:50

Хабарҳои дигари ин бахш

Риояи талаботи муқаррароти қонунҳои миллӣ дар Бонки миллии Тоҷикистон шарҳу тавзеҳ дода шуд
Дар Вазорати меҳнат, муҳоҷират ва шуғли аҳолӣ вобаста ба татбиқи Стратегияи давлатии муқовимат бо коррупсия вохӯрӣ доир гардид
Дар Душанбе маҷлиси Раёсати Кумитаи Иҷроияи Марказии Ҳизби Халқии Демократии Тоҷикистон баргузор гардид
Дар Кооперативи тиҷоратии ба номи Латиф Муродови шаҳри Ҳисор дар майдони 210 гектар кишти такрорӣ мегузаронанд
Дар Суғд биноҳои иловагии Маркази клиникавии эндокринологӣ ва Маркази саратоншиносӣ сохта мешавад
Дар оянда мусофирон дар фурудгоҳҳои Тоҷикистон сарҳадро тавассути «дарвозаи электронӣ» убур менамоянд
ҚОНУНИ ҶУМҲУРИИ ТОҶИКИСТОН «ДАР БОРАИ МАСЪУЛИЯТ БАРОИ ТАЪЛИМУ ТАРБИЯИ КӮДАК». Мулоҳизаҳои доктор ва номзади илмҳои ҳуқуқшиносӣ дар хусуси навгониҳо ва афзалиятҳои ҳуқуқии ин қонун
Беш аз 13 ҳазор гектар заминҳои корам дар ноҳияҳои Восеъ ва Фархор ба воситаи пойгоҳҳои обкашӣ обёрӣ мешаванд
Дар маҳаллаи «Фалакон»-и ноҳияи Шоҳмансури пойтахт доир ба маърифати хонадорӣ барои духтарони ҷавон чорабинӣ баргузор шуд
Ҷамолиддин Абдуллозода бо фаъолияти муассисаҳои тандурустии вилояти Хатлон шинос гардид
СОЛИМИИ МИЛЛАТ-БОИГАРИИ ДАВЛАТ. Соли равон беш аз 87 ҳазор зан аз ташхиси фаросавтӣ гузашт
Вазорати меҳнат, муҳоҷират ва шуғли аҳолӣ: «Эълон оид ба пардохти маблағ аз ҷониби вазорат асоси воқеӣ надорад»