Дар Суди Олии иқтисодӣ Рӯзи Ваҳдати миллиро ботантана таҷлил намуданд

ДУШАНБЕ, 22.04.2024 /АМИТ «Ховар»/. 21 июн дар Суди Олии иқтисодии Ҷумҳурии Тоҷикистон бахшида ба Рӯзи Ваҳдати миллӣ таҳти унвони «Ваҳдати миллӣ — таҷҷасумгари иттиҳоду сарҷамъӣ» ҳамоиши идона баргузор гардид, хабар медиҳад мухбири АМИТ «Ховар».

Дар ҳамоиш Раиси Суди Олии иқтисодӣ Рустам Мирзозода иброз намуд, ки «ҷашни Ваҳдати миллӣ, ки асосан аз фарҳангу хиради сулҳҷуёнаи мардуми тоҷик ва раҳнамоиҳои хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сарчашма мегирад, имрӯз таҷассумгари иттиҳоду ягонагии ҳамаи сокинони мамлакат ва якпорчагии Тоҷикистон мебошад».

Гуфта шуд, ки Ваҳдати миллӣ ва фазои созгори сулҳу субот дар мамлакат тақозо менамояд, ки ҳама дастаҷамъона саъйю талош варзанд, то аз раванди босуръати рушди ҷомеаи ҷаҳонӣ ақиб намонем, наслҳои имрӯзу ояндаро ба сӯйи тамаддуни муосир, яъне дастовардҳои илму фан, техникаву технологияи навтарин ҳидояту раҳнамоӣ созем. Аз ин рӯ, бо мақсади ҳифзу таҳкими давлатдории миллӣ имрӯз дар мамлакат зербинои устувори фардоро гузорем ва дар ҳамаи соҳаҳои ҳаёти ҷомеа кадрҳои баландихтисосро тарбия намоем. Ҳифзи дастоварди нодир ва таърихии халқамон, яъне Ваҳдати миллӣ вазифаи муҳимтарин ва аввалдараҷаи ҳамаи мардуми Тоҷикистон аст.

Иштирокчиёни ҳамоиш доир ба нақш ва аҳамияти Ваҳдати миллӣ дар таъмини рушди устувори мамлакат ибрози назар намуданд.

АКС: АМИТ «Ховар»