Корхонаҳои саноатии шаҳри Хуҷанд дар панҷ моҳ ба маблағи 760,8 миллион сомонӣ маҳсулот истеҳсол намуданд

ДУШАНБЕ, 16.06.2024 /АМИТ «Ховар»/. Дар панҷ моҳи соли равон дар шаҳри Хуҷанд аз ҷониби корхонаҳои саноатӣ ба маблағи 760,8 миллион сомонӣ маҳсулот истеҳсол гардид. Ин нишондиҳанда нисбат ба ҳамин давраи соли 2023  21,6 фоиз зиёд шудааст. Дар ин хусус ба АМИТ «Ховар» дар хадамоти матбуоти Раиси шаҳри Хуҷанд иттилоъ доданд.

Аз миқдори умумии маҳсулоти истеҳсолгашта 152,1 миллион  сомонӣ ба хориҷи мамлакат содир шуда, аз ҷониби 105 корхона маҳсулоти воридотивазкунанда ба маблағи 332,1 миллион сомонӣ истеҳсол карданд, ки ин нишондиҳанда 23,3 фоиз афзоиш ёфтааст.

Дар шаҳри Хуҷанд корхонаи муштараки Тоҷикистон ва Корея- Ҷамъияти дорои масъулияти маҳдуди «Ориён Ҷей Текстайл» фаъолият дорад. Дар айни замон  дар он  130 нафар кор  мекунанд.

Ҷамъият бо ворид намудани технологияи муосир аз кишварҳои хориҷӣ ба дӯхтани либосҳои соҳавӣ, ҳарбӣ, мактабӣ ва ғайра машғул мебошад.Роҳбарияти корхона тасмим гирифтааст дар  ояндаи наздик ба дӯхтани шиму костюмҳои мардона низ  шуруъ намояд.

АКС: Маркази матбуоти Раиси шаҳри Хуҷанд