«ПАЙВАНДИ НАСЛҲО». Дар Душанбе бо собиқадорони футболи тоҷик вохӯрӣ доир гардид

ДУШАНБЕ, 06.06.2024 /АМИТ «Ховар»/. 5 июн дар шаҳри Душанбе таҳти унвони «Пайванди наслҳо» вохӯрии намояндагони Ҳизби Халқии Демократии Тоҷикистон бо собиқадорони футболи тоҷик, варзишгарони шинохтаи ҷумҳурӣ ва футзалбозони тими миллӣ баргузор гардид, иттилоъ доданд ба АМИТ «Ховар» дар  Ҳизби Халқии Демократии Тоҷикистон.

Вохӯрӣ дар доираи «Ҳафтаи футбол дар ташкилоти Ҳизби Халқии Демократии Тоҷикистон» бахшида ба Рӯзи ҷаҳонии футбол баргузор гардид.

Муовини якуми Раиси Ҳизби Халқии Демократии Тоҷикистон Абдуҷаббор Азизӣ аз ташаббусҳои Тоҷикистон дар арсаи байналмилалӣ ва дастовардҳои варзишгарони тоҷик ёдовар шуда, иброз дошт, ки рушди варзиш дар меҳвари Барномаи Ҳизби Халқии Демократии Тоҷикистон қарор дорад. Ҳамзамон варзиш вақти холии наврасону ҷавононро пур намуда, онҳоро аз гароиш ба ҳизбу ҳаракатҳои ифротӣ эмин медорад.

Ба гуфти Абдуҷаббор Азизӣ, «мо аз ин пеш бо ташаббусҳои Президенти Ҷумҳурии Тоҷикистон, Пешвои миллат, Раиси Ҳизби Халқии Демократии Тоҷикистон муҳтарам Эмомалӣ Раҳмон дар соҳаи обу иқлим дар арсаи ҷаҳонӣ муаррифӣ шуда будем. Имрӯз пешниҳоди Рӯзи ҷаҳонии футбол моро бори дигар ба ҷаҳониён муаррифӣ намуд. Он рӯз дер нест, ки футболбозони мо бо натиҷаҳои баланди футболи худ дар арсаи ҷаҳонӣ муаррифи миллат хоҳанд шуд».

Дар ҷараёни вохӯрӣ гуфта шуд, ки имсол ду дастоварди футболбозони мо қобили ситоиш аст- яке роҳ ёфтани дастаи мунтахаби футзали мо ба Ҷоми Осиё ва аз байни 56 давлати Осиё дар қатори 8 дастаи беҳтарин мавқеъ гирифтани дастаи мунтахаби миллии Тоҷикистон.

Ёдовар мешавем, ки 7 май Маҷмаи Умумии Созмони Милали Муттаҳид 25 майро Рӯзи ҷаҳонии футбол эълон кард. Ташаббуси эълони Рӯзи ҷаҳонии футбол аз ҷониби Президенти Ассотсиатсияи футболи Осиёи Марказӣ, Президенти Федератсияи футболи Тоҷикистон, Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ пешниҳод гардид.

 АКС: Кумитаи Иҷроияи Марказии Ҳизби Халқии Демократии Тоҷикистон