8 июл дар якчанд ноҳияҳои вилояти Суғд сел омад

ДУШАНБЕ, 09.07.2024 /АМИТ «Ховар»/. 8 июл,  соати 13:15  дар натиҷаи  боронҳои шадид дар ҳудуди деҳаи Хушекати Ҷамоати деҳоти Айнии вилояти Суғд сел омад, ки 850 метр канали оби нӯшокии шаҳраки Аслонободро аз лой пур кард. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.

Ҳамчунин дар ин рӯз,  соати 16:00,  баъди боришоти шадид дар деҳаи Понғози Ҷамоати деҳоти Понғози ноҳияи Ашт сел омад. Дар натиҷаи омадани  сел қитъаҳои замини сокинон, иншооти ёрирасон ва роҳи байни деҳа хароб гардид.

Иттилоъ дода шуд, ки дар ҳудуди деҳаи Мазори Шарифи Ҷамоати деҳоти ба номи Лоиқ Шералии шаҳри Панҷакент низ сел роҳи байни деҳро, ки тавассути пул ба ҳам васл мешуд, аз лой пур кард.

Бояд гуфт, ки ҷиҳати анҷоми корҳои рафъи оқибатҳои офати табиӣ ба ҷойи ҳодиса техникаи вазнини муҳандисии хадамоти роҳи шаҳр сафарбар карда шуда, корҳои бартарафсозии паёмадҳои сел идома доранд.

Талафоти ҷонӣ ба қайд гирифта нашудааст.

 АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад