НИШАСТИ МАТБУОТӢ. Ҳаҷми умумии маҳсулоти кишоварзӣ аз ҳиссаи хоҷагиҳои ҷамоавӣ ва деҳқонӣ 56 фоизро ташкил медиҳад

ДУШАНБЕ, 25.07.2024 /АМИТ «Ховар»/. Соли равон дар ҳаҷми умумии маҳсулоти кишоварзӣ ҳиссаи хоҷагиҳои ҷамоавӣ ва деҳқонӣ 56 фоиз ва бахши аҳолӣ 44 фоизро ташкил медиҳад. Ин матлабро имрӯз зимни нишасти матбуотӣ дар Вазорати кишоварзии мамлакат баён намуданд.

Иттилоъ дода шуд, ки дар давраи ҳисоботӣ ҳиссаи маҳсулоти кишоварзии истеҳсолнамудаи вилояти Хатлон дар ҳаҷми умумии истеҳсолот 60,5 фоиз, вилояти Суғд 24,9 фисад, Вилояти Мухтори Кӯҳистони Бадахшон 1 фоиз ва шаҳри Душанбе якҷо бо шаҳру ноҳияҳои тобеи ҷумҳурӣ 13,6 фоизро ташкил медиҳад.

Ҳамчунин гуфта шуд, ки дар ҳамаи шаклҳои хоҷагидории ҷумҳурӣ истеҳсоли картошка 267 ҳазору 111 тонна баробар гардид, ки нисбат ба ҳамин давраи соли 5 ҳазору 601 тонна  ё 102,1 фоиз зиёд мебошад.

Дар ҷараёни нишаст иттилоъ доданд, ки соҳаи парандапарварӣ яке аз соҳаҳои асосии самти чорводорӣ ба ҳисоб рафта, дар таъмини аҳолӣ бо ғизои сафедадор мавқеи намоён дорад. Дар ҷумҳурӣ шумораи умумии корхонаҳои парандапарварӣ 228 ададро ташкил менамояд, ки аз ин 112 адад ба истеҳсоли гӯшти паранда машғул мебошанд. То нимаи моҳи июли соли равон дар ҳамаи шаклҳои хоҷагидории ҷумҳурӣ 19 ҳазору 187 тонна гӯшти паранда истеҳсол гардидааст, ки нисбати ҳамин давраи соли гузашта 4 ҳазору 630 тонна кам мебошад.

АКС: АМИТ «Ховар»