Байни Тоҷикистон ва Бонки Осиёии Рушд созишномаҳои грантӣ ба имзо расиданд

ДУШАНБЕ, 13.08.2024 /АМИТ «Ховар»/. Байни Ҷумҳурии Тоҷикистон ва Бонки Осиёии Рушд оид ба лоиҳаи «Барномаи беҳтар намудани муҳити тиҷорат бо назардошти тағйирёбии иқлим» ва маблағгузории иловагии лоиҳаи «Барқарорсозии Неругоҳи барқи обии Сарбанд бо иқтидори 240 МВт» созишномаҳои грантӣ ба имзо расонида шуданд.

Тавре ба АМИТ «Ховар» дар Вазорати молияи Ҷумҳурии Тоҷикистон  хабар доданд, созишномаҳоро 12 август Вазири молия Файзиддин Қаҳҳорзода ва намояндаи доимии Бонки Осиёии Рушд дар Тоҷикистон хонум Шени Кембел ба имзо расониданд.

Маблағи лоиҳаи «Барномаи беҳтар намудани муҳити тиҷорат бо назардошти тағйирёбии иқлим» 50 миллион доллари амрикоиро ташкил намуда, ба дастгирии буҷети давлатӣ равона карда мешавад.

Ҳадафи асосии барнома аз таҳкими корхонаҳои хурду миёна, такмил додани идоракунӣ, шаффофият, рақамикунонӣ ва баланд бардоштани мусоидат ба савдои байналмилалӣ бо назардошти тағйирёбии иқлим иборат мебошад.

Мақсади асосии маблағгузории иловагии лоиҳаи «Барқарорсозии Неругоҳи барқи обии «Сарбанд» бо иқтидори 240 МВт»- ин ивазкунӣ ва ба кор андохтани агрегати рақами 4-и ин неругоҳ буда, он боиси то 274 МВт зиёд шудани иқтидори генераторҳо мегардад.

Арзиши маблағгузории иловагии лоиҳа 21 миллион доллари амрикоиро ташкил намуда, пурра аз ҳисоби маблағҳои грантии Бонки Осиёии Рушд пешбинӣ шудааст.

АКС: Вазорати молияи Ҷумҳурии Тоҷикистон