Бонки миллии Тоҷикистон: Сатҳи таваррум дар ҳудуди поёнии нишондиҳандаи мақсаднок қарор гирифт
ДУШАНБЕ, 08.08.2024 /АМИТ «Ховар»/. Сатҳи таваррум имсол дар Тоҷикистон 1,9 фоизро ташкил намуд, ки нисбат ба ҳамин давраи соли 2023 0,4 банди фоизӣ кам мебошад. Дар ин хусус 7 август Раиси Бонки миллии Тоҷикистон Фирдавс Толибзода дар нишасти матбуотӣ ба хабарнигорон иттилоъ дод.
Ин нишондиҳанда асосан аз ҳисоби болоравии нархи маҳсулоти хӯрокворӣ- 1,3 фоиз, молҳои ғайрихӯрокворӣ- 1,6 фоиз ва арзиши хизматрасониҳои пулӣ- 4,0 фоиз ба амал омад. Таварруми солона дар моҳи июни имсол дар ҳудуди поёнии нишондиҳандаи мақсаднок (6±2 б.ф.) қарор дошта, 3,5 фоизро ташкил дод, ки нисбат ба ҳамин давраи соли 2023 1,1 банди фоизӣ зиёд мебошад.
Фирдавс Толибзода афзуд, ки дар ин давра Бонки миллии Тоҷикистон барои танзими ҳаҷми пул дар муомилот, идоракунии сатҳи пардохтпазирии ташкилоти қарзӣ, коҳиш додани фишорҳои таваррумии монетарӣ ва фаъолгардонии бозори молиявӣ 52 музоядаи фурӯши коғазҳои қиматнок ба маблағи 3,0 миллиард сомонӣ баргузор намуд. Дар ин давра аз ташкилоти қарзӣ тавассути амалиёти амонатҳои шабонарӯзӣ маблағҳои озод ҷалб карда шуданд, ки ба ҳисоби миёна дар як рӯз 982,7 миллион сомониро ташкил менамоянд.
Ҳамзамон дар нишасти матбуотӣ таъкид гардид, ки меъёри бозтамвил ҳамчун фишанги калидии сиёсати пулию қарзӣ бинобар идома ёфтани раванди муътадили сатҳи нархҳои дохилию ҷаҳонии молу маҳсулот, дурнамои мусбати нишондиҳандаҳои макроиқтисодӣ, арзёбии коҳиш ёфтани таъсири хавфҳои эҳтимолӣ ба иқтисодиёт, инчунин аз доираи ҳадафи муқарраргардида паст қарор доштани сатҳи таваррум дар ин давра тадриҷан 0,75 банди фоизӣ паст карда шуда, дар сатҳи 9,25 фоизи солона муқаррар гардид.
Дар ин давра Бонки миллии Тоҷикистон фаъолиятро дар самти татбиқи самараноки сиёсати пулию қарзӣ, рушди ҳисоббаробаркунии ғайринақдӣ ва дигар воситаҳои молиявӣ идома дода, баҳри таъмини муътадилии сатҳи нархҳои дохилӣ ва устувории қурби пули миллӣ, нигоҳ доштани қобилияти пардохтпазирии ташкилоти қарзӣ ва баланд бардоштани эътимоди аҳолӣ ба низоми бонкӣ, инчунин таъмини фаъолияти босуботу бехатари низоми пардохт тадбирҳои зарурӣ андешидааст.
Марзия САИДЗОДА,
АМИТ «Ховар»
АКС: АМИТ «Ховар»
ДЕҲОТИ РАҚАМӢ. Лоиҳа бо мақсади беҳтар намудани дастрасии интернет ва алоқаи мобилӣ дар минтақаҳои Тоҷикистон амалӣ мешавад
Дар Душанбе татбиқи «Барномаи рушди таҳвилгарон ва содирот» расман оғоз гардид
Дар комплекси сайёҳии Шаҳристон — эко резорт ба масофаи зиёда аз 5 километр таноброҳ сохта мешавад
Соли равон фурудгоҳҳои байналмилалии Тоҷикистон ба зиёда аз 1,5 миллион мусофир хизмат расонидаанд
Ҳоким Холиқзода бо Сафири нави Арабистони Саудӣ дурнамои ҳамкориро баррасӣ намуд
НИШАСТИ МАТБУОТӢ. Дар 65 шаҳру ноҳияи Тоҷикистон пойгоҳои базавии стандартӣ 5G насб карда мешавад
Дар Душанбе ҷаласаи дуюми Шурои кории Тоҷикистону Туркманистон баргузор гардид
НИШАСТИ МАТБУОТӢ. Соли равон тавассути ҳама намуди нақлиёт беш аз 76 миллион тонна бор ва 552 миллион мусофир интиқол дода шуд
ҚУРБИ АСЪОР: 1 рубли русӣ аз 0.1110 то 0.1228 сомонӣ муқаррар шудааст
Тавсеаи ҳамкорӣ байни Тоҷикистон ва Агентии давлатии ҳамкории байналмилалӣ ва рушди Чин баррасӣ шуд
НИШАСТИ МАТБУОТӢ. Дар 55 деҳа, маҳалла ва шаҳракҳои Тоҷикистон тадқиқоти муҳандисӣ-геологӣ анҷом дода шуд
Телевизиони «Синамо» силсилафилми ҳунарии «Нерӯи ишқ»-ро таҳия намуд
