Дар хоҷагиҳои деҳқонии «Ғуфрониён» ва «Сӯфизода»-и ноҳияи Мастчоҳ 40 фоизи пахта барои ҷамъоварӣ омода аст

ДУШАНБЕ, 21.09.2024. /АМИТ «Ховар»/. Имсол хоҷагиҳои деҳқонии «Ғуфрониён» ва «Сӯфизода»-и ноҳияи Мастчоҳ  дар 12 ҳазору 400 гектар пунбадона кишт намудаанд, ки ҳоло 40 фоизи пахта барои чиндан омода аст. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳияи Мастчоҳ хабар доданд.

Саҳмдорони ин хоҷагиҳо ба ҷамъоварии ҳосил машғул буда, ҳаққи чиниши пахта барои як килограмм 1 сомонӣ муқаррар шудааст.

Кишоварзони ноҳия нақша доранд, ки беш аз 31 ҳазор тонна пахта ҷамъоварӣ намуда, ба корхонаҳои коркард супоранд.

Ёдовар мешавем, ки имсол кишоварзони ҷумҳурӣ дар майдони 174 ҳазору 976 гектар кишти пунбадона гузарониданд, ки нисбат ба соли 2023   105 фоиз зиёд мебошад.

Пахта зироати стратегӣ маҳсуб шуда, назар ба дигар зироати кишоварзӣ метавонад манфиати иқтисодӣ ва даромади бештар орад. Ҳангоми дуруст риоя кардани агротехникаи парвариши он ҳосили хуб рӯёнида мешавад.

АКС: Мақомоти иҷроияи ҳокимияти давлатии ноҳияи Мастчоҳ