Дар Хуросон вобаста ба пешгирии хурофот ва ифротгароӣ бо ходимони дин вохӯрӣ доир гардид

ДУШАНБЕ, 24.09.2024. /АМИТ «Ховар»/. Дар ноҳияи Хуросон доир ба пешгирии равандҳое, ки дар ҷаҳони муосир идома доранд, аз ҷумла бархӯрди фарҳангу тамаддунҳо, тафриқаву низоъҳои диниву мазҳабӣ, густариши бесобиқаи терроризму экстремизми динӣ бо ходимони дин вохӯрӣ диор гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳияи Хуросон хабар доданд.

Иброз гардид, ки ифротгароӣ  яке аз зуҳуроти номатлуби замони муосир буда, мақсади он аз байн бурдани давлатҳо, миллатҳо ва халқҳо мебошад. Ифротгаро касе аст, ки ба барангехтани низои нажодӣ, миллӣ-иҷтимоӣ ва динӣ даъват мекунад.

Имрӯзҳо шабакаҳои иҷтимоӣ яке аз роҳҳо ва омилҳои ҷалби ҷавонон ба гурӯҳҳои ифротӣ гардидаанд. Дар ин самт фаъолони гурӯҳҳои ифротӣ дар шабакаҳои иҷтимоӣ мавод ва маълумотро интихобан нашр менамоянд, то ба ин васила мағзи ҷавононро шуста, фикри онҳоро нисбат ба волидайн, ҷомеа, давлат ва инсоният тағйир диҳанд.

Аз ин рӯ таъкид гардид, ки пешгирии ин зуҳуроти хавфнок ва мубориза бо ифротгароию экстремизми динӣ-сиёсӣ танҳо вазифаи ниҳодҳои дахлдор нест, балки тамоми шаҳрвандон, бахусус ходимони дин бояд дар ин самт саҳми назаррас дошта бошанд. Чунки ин омилҳои номатлуб ба рушди минбаъдаи давлат халали ҷиддӣ ворид намуда, ба ваҳдати миллӣ, истиқлолияти давлатӣ ва бехатарии мамлакат таҳдид менамоянд.

АКС: Мақомоти иҷроияи ҳокимияти давлатии ноҳияи Хуросон