Дар Кушониён масъалаи хобонидани биокомпост дар шароити водии Вахш баррасӣ гардид

ДУШАНБЕ, 24.09.2024. /АМИТ «Ховар»/. Дарёфти роҳу усулҳои муосири самаранок истифода бурдани нуриҳои микробиологӣ дар шароити тағйирёбии иқлим ва мутобиқ намудани зироати кишоварзӣ дар шароити имрӯза, роҳҳои пешгирӣ ва барқарор намудани мувозинати биологии хок дар рушди соҳаи кишоварзӣ, баланд бардоштани ҳосилхезии хок, ба даст овардани маҳсулоти босифату аз лиҳози экологӣ тоза ва роҳҳои биологии пешгирии шӯршавии замин дар конференсияи илмию амалии минтақавӣ дар мавзуи «Таъсири нуриҳои микробиологӣ ба хусусияти хоку растанӣ ва моҳияти хобонидани биокомпост дар шароити водии Вахш», ки дар ноҳияи Кушониён баргузор шуд, баррасӣ гардид. Дар ин хусус ба АМИТ «Ховар» дар Институти хокшиносӣ ва агрохимияи Академияи илмҳои кишоварзии Тоҷикистон хабар доданд.

Таҳкими ҳамкорӣ байни Институти хокшиносӣ ва агрохимия бо хоҷагиҳои деҳқонии минтақаи водии Вахш барои баланд бардоштани малакаи хоҷагидорон бобати самаранок истифода бурдани нуриҳои микробиологӣ, технологияҳои хобонидани тарзҳои гуногуни биокомпост ва нуриҳои минералию органикӣ бо мақсади зиёд намудани ҳосилнокӣ ва маҳсулнокии зироати кишоварзӣ дар самти таъмини амнияти озуқавории мамлакат аз тадбирҳои судманд мебошад.

Дар конфронс иштирокчиён раванди баланд бардоштани истифодаи самараноки нуриҳои органикӣ ва микробиологиро дар заминҳои обёришавандаи водии Вахш муҳим арзёбӣ карданд.

АКС: Институти хокшиносӣ ва агрохимияи Академияи илмҳои кишоварзии Тоҷикистон