Дар Муассисаи таҳсилоти миёнаи умумии рақами 9-и Норак 6 синфхонаи иловагӣ ба истифода дода шуд
![](https://khovar.tj/wp-content/uploads/2024/09/photo_2024-09-02_08-17-19.jpg)
НОРАК, 02.09.2024. /АМИТ «Ховар»/. Дар Муассисаи таҳсилоти миёнаи умумии рақами 9-и шаҳри Норак 6 синфхонаи иловагӣ сохта, ба истифода дода шуд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Норак иттилоъ доданд.
Сохтмони 6 синфхонаи иловагӣ дар ҳудуди ин муассиса барои 300 нафар хонанда, воқеъ дар маҳаллаи Энергетики минтақаи манзилии рақами 4-и шаҳри Норак дар доираи корҳои ободонию бунёдӣ ба муносибати ҷашни 35-солагии Истиқлоли давлатии Ҷумҳурии Тоҷикистон бунёд гардид.
Синфхонаҳои иловагӣ дар заминаи ҳамкории дуҷонибаи Мақомоти иҷроияи ҳокимияти давлатии шаҳри Норак ва давлати Ҷопон дар муддати кӯтоҳ ва бо сифати баланд сохта шуданд.
Зимни ба истифода додани синфхонаҳои таълимӣ Раиси шаҳри Норак аз таваҷҷуҳ ва ғамхориҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди соҳаи маориф ёдовар шуд.
Хонандагон ваъда доданд, ки дар ҷавоб ба ғамхориҳои Пешвои миллат хубу аъло хонда, дар оянда ба халқу Ватан хизмат менамоянд.
АКС: Мақомоти иҷроияи ҳокимияти давлатии шаҳри Норак