Дар Тоҷикистон 40 фоизи истеҳсоли картошка ба водии Рашт рост меояд
ДУШАНБЕ, 11.09.2024 /АМИТ «Ховар»/. Водии Рашт яке аз минтақаҳои асосии картошкапарварӣ дар мамлакат ба шумор рафта, 40 фоизи истеҳсоли картошкаи мамлакат ба ин минтақа рост меояд.
Тавре ба АМИТ «Ховар» дар Вазорати кишоварзии Ҷумҳурии Тоҷикистон иттилоъ доданд, имсол дар ноҳияи Рашт дар 3430 гектар картошка кишт карда шуд, ки он соли 1991 580 гектарро ташкил медод. Инчунин дар ноҳияи Тоҷикобод дар 2013 гектар, Лахш- 5509, Нуробод- 728 ва дар ноҳияи Сангвор дар 1150 гектар картошка кишт шудааст, ки дар маҷмуъ 12 ҳазору 830 гектарро ташкил медиҳад.
Дар Тоҷикистон картошка дар минтақаи водии Рашт, ноҳияҳои вилояти Хатлон, вилояти Суғд, водии Ҳисор ва минтақаи Вилояти Мухтори Кӯҳистони Бадахшон парвариш мешавад. Аз ҳама навъи беҳтарини он ба минтақаи Рашт рост меояд.
Ба гуфти олимони соҳаи кишоварзӣ, картошка дар системаи киштгардони зироат ҳамчун зироати пешкиштшаванда хуб дониста мешавад, зеро баъди кишти он қабати болоии хок ковок гашта, алафҳои бегона хеле кам мешаванд. Картошка ҳамчун зироат асосан ба воситаи лӯндаҳо парвариш меёбад. Дар ин минтақа картошка моҳҳои апрелу май кишт шуда, ҳосили он моҳҳои сентябру октябр ҷамъоварӣ карда мешавад.
Захираву имконоти ноҳияҳои водии Рашт дар самти рушди кишоварзӣ ва таъсиси ҷойҳои нави кор хеле зиёд мебошанд.
Тавре Президенти Ҷумҳурии Тоҷикистон муҳтарам Эмомалӣ Раҳмон 22 сентябри соли 2021 зимни суханронӣ бо сокинони ноҳияи Рашт таъкид намуданд, «…аз тамоми захираву имконияте, ки дорем, пеш аз ҳама, обу замин, хусусан заминҳои наздиҳавлигӣ ва президентӣ бояд оқилонаву самаранок истифода бурда, ҳарчи бештар маҳсулот истеҳсол кунем, то ки мардумамон дар фасли тирамоҳу зимистони дарпешистода танқисиву азият накашанд».
Сардори Раёсати кишоварзии ноҳияи Рашт Мирзо Латипов иттилоъ дод, ки то имрӯз кишоварзони ноҳия ҳосили 350 гектар майдони картошкаро ҷамъоварӣ намудаанд. Дар айни замон ҷамъоварии картошка идома дорад.
Мирзо Латипов иброз намуд, ки ноҳияҳои водии Рашт барои парвариши картошка имконияти васеъ ва таҷрибаи бой доранд. Картошка нони дуюм ба ҳисоб меравад ва зарур аст, ки бо назардошти шароити ҷаҳони имрӯза мо ин маҳсулотро ҳарчи бештар истеҳсол ва захира кунем.
Фирӯза ДАВЛАТЗОДА,
АМИТ «Ховар»
АКС аз манбаъҳои боз
Имрӯз дар баъзе ноҳияҳои кӯҳии Тоҷикистон борони кӯтоҳмуддат меборад
Дар Бохтар таҳти унвони «Номи неки қаҳрамонон ҷовидон мемонад» конференсияи илмӣ-амалӣ баргузор шуд
САҲМИ МАН ДАР ШАҲРИ МАН. Дар панҷ моҳи соли равон дар пойтахт 37 маротиба аксияи «Тозагии соҳил» ва 34 маротиба аксияи «Тозагии маҳал» доир гардид
Дар Испания шумораи рекордии фавт аз гармӣ ба қайд гирифта шуд
Сокини ноҳияи Ҷайҳун: «Усули кишти зери плёнка дар баробари сифати маҳсулот ҳосилнокиро низ зиёд мекунад»
Имрӯз дар шаҳри Душанбе ҳаво то 32 дараҷа гарм мешавад
Кишоварзони Тоҷикобод дар беш аз 2100 гектар картошка кишт менамоянд
Имрӯз дар баъзе минтақаҳои Тоҷикистон борони кӯтоҳмуддат меборад
Оид ба таъсири омилҳои антропогенӣ ба ҳавзаи дарёи Сурхоб дар шароити тағйирёбии иқлим машварат баргузор гардид
Бахшида ба Рӯзи Ваҳдати миллӣ бо соҳибкорони «Бозори Корвон» вохӯрӣ баргузор шуд
Дар ноҳияи Айнӣ кишти помидор бо усули обёрии қатрагӣ ба роҳ монда мешавад
