Тоҷикистон ва Қазоқистон ҳамкориро дар соҳаи молия густариш медиҳанд

ДУШАНБЕ, 13.09.2024 /АМИТ «Ховар»/. 12 сентябр дар шаҳри Остонаи Ҷумҳурии Қазоқистон бо мақсади дар амал татбиқ намудани Ёддошти тафоҳум байни Вазорати молияи Ҷумҳурии Тоҷикистон ва Вазорати молияи Ҷумҳурии Қазоқистон аз ҷониби муовини якуми Вазири молияи Ҷумҳурии Тоҷикистон Юсуф Маҷидӣ ва муовини Вазири молияи Ҷумҳурии Қазоқистон Кенбеил Даурен Маратули нақшаи чорабиниҳои ҳамкорӣ ба имзо расонида шуд. Дар ин хусус АМИТ «Ховар» бо истинод ба Вазорати молияи ҷумҳурӣ хабар медиҳад.

Дар ин замина ҳайати Вазорати молияи Тоҷикистон бо таҷрибаи пешқадами Вазорати молияи Қазоқистон дар самти рақамикунонии низоми молияи давлатӣ, маблағгузории соҳаи маориф ва низоми автоматикунонии хариди давлатӣ шинос шуд.

Инчунин намояндагони Вазорати молия бо фаъолияти Маркази электронии молиявии Қазоқистон шинос шуданд. Ҷонибҳо барои боз ҳам тақвият додани ҳамкории мутақобилан судманд байни Вазорати молияи Ҷумҳурии Тоҷикистон ва Вазорати молияи Ҷумҳурии Қазоқистон ва мубодилаи таҷриба дар ин самт изҳори омодагӣ намуданд.

Юсуф Маҷидӣ ҳайати Қазоқистонро барои шиносоӣ бо низоми иттилоотии идоракунии молияи давлатӣ ба Тоҷикистон даъват намуд.

АКС: Вазорати молияи Ҷумҳурии Тоҷикистон