Ҳайати Тоҷикистон дар ҷаласаҳои солонаи Хазинаи байналмилалии асъор ва Гурӯҳи Бонки ҷаҳонӣ иштирок намуд

ДУШАНБЕ, 23.10.2024 /АМИТ «Ховар»/. Аз 21 то 26 октябри соли равон дар Вашингтон ҷаласаҳои солонаи Хазинаи байналмилалии асъор ва Гурӯҳи Бонки ҷаҳонӣ дар соли 2024 гузаронида мешаванд. Ба АМИТ «Ховар» дар Бонки миллии Тоҷикистон иттилоъ доданд, ки ҳайати Ҷумҳурии Тоҷикистонро дар ҷаласаҳои солонаи Хазинаи байналмилалии асъор ва Гурӯҳи Бонки ҷаҳонӣ Вазири молияи Ҷумҳурии Тоҷикистон Файзиддин Қаҳҳорзода ва Раиси Бонки миллии Тоҷикистон Фирдавс Толибзода намояндагӣ мекунанд.

Дар кори ҷаласаҳои солонаи Хазинаи байналмилалии асъор ва Гурӯҳи Бонки ҷаҳонӣ ҳамасола намояндагони сатҳи баланди бонкҳои марказӣ (миллӣ), вазоратҳои молия, фондҳо, ташкилоти байналмилалии молиявӣ, агентиҳои байналмилалӣ ва роҳбарони бахшҳои хусусӣ масъалаҳои марбут ба дурнамои макроиқтисодӣ бо назардошти номуайяниҳо дар бозори молиявӣ, идоракунии дороиҳои давлатӣ дар шароити феълӣ, сармоягузориҳои устувор, ҳамгироии иқлим ва табиат, нақши бонкҳои марказӣ дар идоракунии дороиҳо, мушкилоти амалиётӣ ва шаклҳои гуногуни кумаки самаранокро муҳокима менамоянд.

Ҳамзамон дар баробари мулоқоту суҳбатҳои кории ҳайатҳои гуногуни ҷаҳонӣ дар ҳошияи ҷаласаҳо барои доираи васеи иштирокдорон машваратҳо, брифингҳо ва дигар чорабиниҳо доир ба иқтисоди ҷаҳонӣ, рушди муносибатҳои байналмилалӣ ва низоми молиявии ҷаҳонӣ доир мегарданд.

АКС: Бонки миллии Тоҷикистон