Ба адабиётшиноси маъруфи тоҷик Садрӣ Саъдиев Ордени «Дӯстӣ» тақдим карда шуд

ДУШАНБЕ, 10.10.2024 /АМИТ «Ховар»/. Зимни ҳамоиши ботантана дар Донишгоҳи давлатии Самарқанд Сафири Фавқулода ва Мухтори Ҷумҳурии Тоҷикистон дар Ҷумҳурии Узбекистон Абдуҷаббор Раҳмонзода аз номи Ҳукумати Ҷумҳурии Тоҷикистон ба адабиётшиноси шинохта, профессор Садрӣ Саъдиев Ордени «Дӯстӣ» супорида, зимнан хизматҳои шоистаи устодро дар рушди илми адабиётшиносии тоҷик таъкид намуд. Дар ин хусус АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Узбекистон иттилоъ медиҳад.

Ҳамзамон дар ин ҳамоиш ба чанде аз адабиётшиносон ва аҳли зиё Ифтихорнома тақдим гардид.

Инчунин ба муносибати Рӯзи омӯзгорон зиёиёни тоҷик, профессорон Аслиддин Қамарзода, Ҷумъа Ҳамроҳ, Ҷӯлибой Элтазаров ва муаллима Дилором Усмонова бо унвони «Аълочии таълими халқ» ва ифтихорномаҳо сарфароз гардиданд.

Ректори Донишгоҳи давлатии Самарқанд, профессор Рустам Холмуродов аз густариши робитаҳои фарҳангии ду давлати ҳамсоя изҳори қаноатмандӣ ва аз қадршиносии аҳли илму зиё ба Ҳукумати Ҷумҳурии Тоҷикистон арзи сипос намуд.

АКС: Сафорати Ҷумҳурии Тоҷикистон дар Ҷумҳурии Узбекистон