Бахшида ба Рӯзи забони давлатӣ дар Китобхонаи миллӣ ҳамоиш баргузор гардид

ДУШАНБЕ, 05.10.2024. /АМИТ «Ховар»/. «Забон-муҳимтарин унсури ҳастӣ ва бақои миллат аст»- таҳти ин унвон бахшида ба Рӯзи забони давлатӣ дар Муассисаи давлатии «Китобхонаи миллӣ» ҳамоиш доир гардид. Дар ин хусус АМИТ «Ховар» бо истинод ба Китобхонаи миллии Тоҷикистон хабар медиҳад.

Зимни ҳамоиш иштирокчиён дар бораи таърихи мақоми давлатӣ гирифтани забони тоҷикӣ ва нақши созандаи Президенти Ҷумҳурии Тоҷикистон муҳтарам Эмомалӣ Раҳмон дар рушди забони давлатӣ изҳори назар намуданд.

Забон бо тафаккур алоқаи бевосита дорад. Ҳар фикре, ки дар зеҳн пайдо мешавад, ба воситаи забон шакл мегирад. Забон ягона восита ва шакли асосии ифодаи фикр аст, таъкид гардид дар чорабинӣ.

Хамчунин дар доираи ҳамоиш вобаста ба «Нақши воситаҳои ахбор дар рушди забони миллӣ» маъруза пешниҳод гардид.

Иброз шуд, ки воситаҳои ахбори омма яке аз шохаҳои соҳаи забоншиносӣ ба шумор мераванд, аз ин рӯ кормандони онро ро зарур аст, ки дар рушду такомули забони миллӣ нақши босазо гузоранд.

Забони тоҷикӣ яке аз қадимтарин забонҳои дунё ба ҳисоб рафта, бо ин забон донишмандону бузургони илму адаб осори оламшумул офарида, дар ғановати ганҷинаи фарҳангу тамаддуни умумибашарӣ саҳми арзанда гузоштаанд.

Президенти Ҷумҳурии Тоҷикистон муҳтарам Эмомалӣ Раҳмон таъкид намудаанд, ки «бо забони тоҷикӣ, ки аз ҷумлаи қадимтарин ва гуворотарин забонҳои дунё ба ҳисоб меравад, таърихи бостонӣ ва фарҳангу тамаддуни камназири миллате иншо гардидааст, ки ба ҷаҳони аз ҳикмати зиндагӣ ва ахлоқи ҳамидаи инсонӣ сабақҳои мондагору омӯзанда додааст ва ин рисолати хешро то имрӯз идома дода истодааст».

АКС: Китобхонаи миллии Тоҷикистон