Дар Донишгоҳи давлатии Кӯлоб оид ба низоми пардохти ғайринақдӣ конференсияи ҷумҳуриявӣ доир шуд

ДУШАНБЕ, 13.10.2024. /АМИТ «Ховар»/. 10 октябр дар Донишгоҳи давлатии Кӯлоб ба номи Абуабдуллоҳи Рӯдакӣ дар мавзуи «Муаммоҳои муосири баҳисобгирии муҳосибӣ, таҳлил ва аудит дар шароити ғайринақдикунонии пардохтҳо» конференсияи ҷумҳуриявии илмӣ-назариявӣ баргузор гардид. Дар ин хусус ба АМИТ «Ховар» дар ин донишгоҳ хабар доданд.

Кори конфронс бо намоиши асарҳои Пешвои миллат ва дастовардҳои омӯзгорони донишгоҳ оғоз гардид.

Иброз шуд, ки дар шароити муосир ва муносибатҳои зудрушдёбандаи иқтисоди бозорӣ, инчунин марҳила ба марҳила татбиқ гардидани иқтисодиёти рақамиву инкишофи тиҷорати электронӣ масъалаи мукаммалгардонии низоми пардохти ғайринақдӣ ва тавсеаи истифодаи пардохтҳои ғайринақдӣ барои таъмини рушди устувори иқтисоди миллӣ бисёр муҳим мебошад.

Дар вазъияти зудтағйирёбандаи муносибатҳои иқтисодӣ ва сиёсии ҷаҳон хавфҳои эҳтимолии иқтисодию молиявӣ зиёд гардида, ба устувории макроиқтисодӣ ва молиявӣ таъсири манфӣ мерасонанд. Дар конфронс доир ба «Масоили мубрами баҳисобгирии муҳосибӣ дар шароити рақамикунонии иқтисодиёт» ва «Нақши пардохтҳои ғайринақдӣ дар рушди устувори иқтисоди миллӣ» маърузаҳо пешниҳод шуданд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ