Дар Душанбе бо ҷалби равоншиносони хориҷӣ барои варзишгарон машварати омӯзишӣ оғоз ёфт

ДУШАНБЕ, 08.10.2024. /АМИТ «Ховар»/. Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз ҷониби Маркази такмили ихтисоси кормандони соҳаи тарбияи ҷисмонӣ ва варзиш барои баланд бардоштани дониши соҳавии мураббиёну варзишгарон дар самти психологияи варзишӣ таҳти унвони «Нақши психологияи варзишӣ дар ҳавасмандсозӣ ва идоракунии варзишгарон: роҳҳои беҳтар кардани натиҷаҳои варзишӣ» машварати омӯзишӣ оғоз гардид. Дар ин хусус ба АМИТ «Ховар» дар Кумитаи кор бо ҷавонон ва варзиши ҷумҳурӣ хабар доданд.

Машварати омӯзишӣ бо ҷалби мутахассисони хориҷӣ доир гардида, имкон фароҳам меорад, ки варзишгарон донишу таҷрибаашонро дар соҳаи психологияи варзишӣ ғанӣ намуда, усулҳои муосири баланд бардоштани натиҷаҳои варзиширо омӯзанд.

Равоншиносӣ воситаи муассири ҳавасмандсозӣ ва идоракунии варзишгарон аст, ки барои ноил шудан ба натиҷаҳои олӣ кумак мекунад. Аз ин рӯ дар музаффарияти варзишгарон дар баробари омодагии ҷисмонӣ омодагии равонӣ низ нақши ҳалкунанда мебозад.

Ёдовар мешавем, ки аз ҷониби Маркази такмили ихтисоси кормандони соҳаи тарбияи ҷисмонӣ ва варзиш маротибаи 5–ум аст, ки аз хориҷи мамлакат мутахассисони сатҳи байналмилалӣ барои  омӯзонидани мураббиёну масъулини соҳа ва такмили донишҳои соҳавӣ даъват мегарданд.

Машварати омӯзишӣ барои мураббиёни варзиш то 10 октябр идома меёбад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон