Дар Ню-Йорк масъалаи татбиқи ташаббуси навбатии Президенти Тоҷикистон оид ба нақши зеҳни сунъӣ баррасӣ шуд

ДУШАНБЕ, 17.10.2024 /АМИТ «Ховар»/. 16 октябр Намояндаи доимии Ҷумҳурии Тоҷикистон дар Созмони Милали Муттаҳид Ҷонибек Ҳикмат бо Намояндаи вижаи Дабири кулли Созмони Милали Муттаҳид оид ба фанноварӣ Амандип Сингҳ Гилл мулоқот намуд. Дар ин хусус АМИТ «Ховар» бо истинод ба Намояндагии доимии Ҷумҳурии Тоҷикистон дар Созмони Милали Муттаҳид хабар медиҳад.

Зимни вохӯрӣ ҷонибҳо дар масъалаи татбиқи ташаббуси навбатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба нақши зеҳни сунъӣ дар фароҳамсозии имконияти нав барои рушди соҳаҳои иқтисодиву иҷтимоӣ ва суръатбахшӣ барои расидан ба ҳадафҳои рушди устувор дар Осиёи Марказӣ мубодилаи афкор карданд.

Инчунин мусоҳибон бобати пешбурди саривақтии ин раванд баргузории чорабиниҳои марбутаро дар атрофи ин мавзуъ, алалхусус пешбарии лоиҳаи қатъномаи Маҷмаи Умумии Созмони Милали Муттаҳид муҳим арзёбӣ намуданд.

АКС: Намояндагии доимии Ҷумҳурии Тоҷикистон дар Созмони Милали Муттаҳид