Дар Пекин байни вазоратҳои корҳои хориҷии Тоҷикистон ва Чин машваратҳо доир шуданд

ДУШАНБЕ, 31.10.2024 /АМИТ «Ховар»/. 30-31 октябр дар шаҳри Пекин байни вазоратҳои корҳои хориҷии Тоҷикистон ва Чин машваратҳо баргузор гардиданд, ки онҳоро муовини Вазири корҳои хориҷии Ҷумҳурии Тоҷикистон Содиқ Имомӣ ва ёвари Вазири корҳои хориҷии Ҷумҳурии Мардумии Чин Лю Бин роҳбарӣ намуданд. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Зимни машваратҳо вазъ ва дурнамои ҳамкории дуҷонибаи Тоҷикистон ва Чин дар бахшҳои сиёсӣ, тиҷоратӣ-иқтисодӣ, сармоягузорӣ, фарҳангию гуманитарӣ, инчунин масъалаҳои ҳамкорӣ дар доираи созмонҳои байналмилалӣ (Созмони Милали Муттаҳид, Созмони ҳамкории Шанхай, Машварати ҳамкорӣ ва тадбирҳои боварӣ дар Осиё) мавриди баррасии муфассал қарор дода шуд.

Роҳбарони ҳайатҳо доир ба масъалаҳои мубрами рӯзномаи байналмилалӣ ва минтақавӣ табодули афкор намуда, иҷрои тавофуқоти феълиро, ки дар сатҳи олӣ ҳосил шудаанд, матраҳ намуданд.

АКС: Вазорати корҳои хориҷии Ҷумҳурии Тоҷикистон