Дар шаҳри Хоруғ корхонаи гӯшт ва маҳсулоти гӯштӣ бунёд мегардад
ДУШАНБЕ, 24.10.2024 /АМИТ «Ховар»/. Дар ҳудуди Парки технологии шаҳри Хоруғ корхонаи гӯшт ва маҳсулоти гӯштӣ бунёд мегардад. Корхонаи мазкур асосан аз гӯшти қутос маҳсулот истеҳсол менамояд. Технологияи корхона аз давлатҳои Олмон ва Австрия ворид карда мешавад, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии Вилояти Мухтори Кӯҳистони Бадахшон.
Тибқи иттилои манбаъ, сохтмони корхона моҳи марти соли 2024 оғоз шуда, масоҳати умумии он 2 600 метри мураббаъро ташкил медиҳад.
Баробари ба фаъолият оғоз намудани ин корхона 50 нафар бо кор таъмин мешаванд. Корхона ашёи хомро барои истеҳсоли маҳсулот, ки асосан гӯшти қутос аст, аз ноҳияи Мурғоб ва дигар хоҷагиҳои деҳқонии ноҳияҳои вилоят харидорӣ менамояд.
Бояд тазаккур дод, ки қутоспарварӣ яке аз соҳаҳои камхарҷ ва сердаромад ба шумор рафта, гӯшту шири қутос аз ҷиҳати экологӣ тозатарин ҳисобида мешаванд. Сол аз сол талабот ба ин маҳсулот на танҳо дар Тоҷикистон, балки дар ҷаҳон бештар мегардад.
Роҳбарияти корхонаи мазкур тасмим гирифтаанд, ки пас аз оғози фаъолият, дар баробари таъмини бозори дохилӣ бо маҳсулот, онро ба хориҷи мамлакат низ содирот намоянд.
Ҳукумати Ҷумҳурии Тоҷикистон ба рушди қутоспарварӣ таваҷҷуҳи хосса зоҳир намуда, баҳри зиёд кардани саршумори ин намуди чорво барномаи махсуси давлатӣ қабул намудааст. Иқлими ноҳияи баландкӯҳи Мурғоб назар ба дигар ноҳияҳои кӯҳӣ барои рушди қутоспарварӣ хеле мутобиқ аст. Танҳо дар канори яке аз зеботарин кӯлҳои ин ноҳия- Зоркӯл зиёда аз 9 чарогоҳи зимистона мавҷуд буда, дар ҳар яки ин чарогоҳҳо то 100 сар қутос парвариш меёбад.
Тавре коршиносон иброз доштанд, барои афзоиши саршумори ин намуди чорво ба ҷуз ноҳияи Мурғоб, дар хоҷагиҳои чорвопарварии ноҳияҳои Роштқалъаву Дарвоз низ имконияти мусоид мавҷуд аст. Бахусус иқлим ва чарогоҳҳои баландкӯҳи Ҷамоати деҳоти Сағирдашти ноҳияи Дарвоз барои парвариши қутос хеле мувофиқ мебошад. Айни замон дар назди хоҷагиҳои деҳқонии вилоят ба ташкили фермаҳои қутоспарварӣ шуруъ намудаанд, ки он самараи хуб ба бор меорад.
Рухсораи НУР,
АМИТ «Ховар»
Акс: АМИТ «Ховар»
Ҳаҷми умумии маблағгузории сармоя дар ноҳияи Хуросон ба зиёда аз 337 миллион сомонӣ расонида шуд
Ташаббусҳои глобалии Тоҷикистон дар масъалаи обу иқлим дар муколамаи ҷавонон баррасӣ шуданд
Сулаймон Зиёзода дар ноҳияи Спитамен бо вазъи соҳаҳои пахтакорӣ, боғдорӣ ва токпарварӣ шинос гардид
Ҷаласаи 21-уми Кумитаи ҳамоҳангсоз оид ба содагардонии расмиёти савдо доир шуд
Дар вилояти Хатлон имконоти ҳамкорӣ дар самти бунёди неругоҳҳои барқӣ баррасӣ гардид
РУШДИ СОҲАИ КИШОВАРЗӢ ДАР 35 СОЛИ ИСТИҚЛОЛИЯТИ ДАВЛАТӢ. Ҳаҷми умумии маҳсулоти кишоварзӣ 3,7 баробар афзоиш ёфтааст
14 август Озмуни ҷумҳуриявии «Топ-35-шарики боэътимоди сол» баргузор мегардад
Тоҷикистон таҷрибаи пешрафтаи Қазоқистонро дар самти истифода аз технологияҳои нав барои рушди соҳаи мелиоратсия меомӯзад
Дар Тоҷикистон низоми e-Phyto татбиқ мегардад
Оид ба кам намудани талафоти неруи барқ дар вилояти Хатлон Созишномаи қарзии иловагӣ ба имзо расид
Дар вилояти Суғд ба маблағи 20,5 миллиард сомонӣ маҳсулоти саноатӣ истеҳсол гардидааст
Тоҷикистон ба SpaceX/Starlink лоиҳаи Харитаи роҳи ҳамкориро пешниҳод намуд
