Флорида бо сабаби наздикшавии тӯфони «Милтон» ба бузургтарин тахлия дар 7 соли охир омода мешавад

ДУШАНБЕ, 08.10.2024 /АМИТ «Ховар»/. Дар назар аст, ки тӯфони «Милтон» ба Иёлоти Муттаҳидаи Амрико 9 октябр расад. Ин дар ҳоле аст, ки чанде пеш тӯфони «Хелен» ба ин минтақа зарари ҷиддӣ расонид ва беш аз 200 нафар бар асари он ҳалок шуданд.  Дар ин хусус Sky News  хабар додааст, иттилоъ медиҳад АМИТ «Ховар».

Иёлоти амрикоии Флорида ба бузургтарин тахлия давоми 7 соли охир омода мешавад.

Пешгӯӣ мешавад, ки дар айни замон тӯфон ба самти шарқ тавассути халиҷи Мексика ҳаракат намуда, ба халиҷи Тампа расида, сипас ба шаҳри Орландои иёлоти Флорида мегузарад.  Обуҳавошиносон изҳор медоранд, ки қисмате аз минтақаҳое, ки бар асари тӯфони «Хелен» зарар дида буданд, эҳтимол дубора дар минтақаи офати табиӣ қарор гиранд, ки ин зарарро дучанд мекунад.

Директори шуъбаи идоракунии ҳолатҳои фавқулодаи Флорида Кевин Гатри ҳушдор дод, ки сокинон бояд ба бузургтарин тахлия,  ки дар давраи тӯфони «Ирма» дар соли 2017 дида будем, омода шаванд.

Соли 2017 тақрибан 7 миллион нафар ҳушдор гирифта буданд, ки хонаҳояшонро дар Флорида аз сабаби тӯфони «Ирма»,  ки дар натиҷаи он дар иёлот беш аз 130 нафар фавтид, тарк намоянд.

Шаҳраки Пинеллас дар Флорида эҳтимол ба тахлияи ҳатмии беш аз 500 000 нафар сокинони минтақаҳои дар пастӣ ҷойгиршуда низ амр диҳад.

Ҳушдор барои тӯфон барои сокинони соҳили шимолии нимҷазираи Юкатани Мексика низ пахш шудааст.

АКС аз манбаъҳои боз