Бахшида ба 30-солагии қабули Конститутсия дар Кумитаи ҳифзи муҳити зисти Тоҷикистон ҷамъомади идона доир шуд

ДУШАНБЕ, 06.11.2024 /АМИТ «Ховар»/. Дар даврони соҳибистиқлолӣ дар заминаи Конститутсияи нав якчанд ҳуҷҷату санадҳои давлатӣ қабул гардиданд, ки муҳимтарини онҳо «Стратегияи миллии рушди Ҷумҳурии Тоҷикистон», қонунҳои Ҷумҳурии Тоҷикистон «Дар бораи забони давлатии Ҷумҳурии Тоҷикистон», мақоми зан дар ҷомеа, рушди маориф, танзими анъана ва ҷашну маросим ва таълиму тарбияи фарзанд мебошанд. Чунин гуфта шуд дар ҷамъомади идонае, ки дар Кумитаи ҳифзи муҳити зисти назди Ҳукумати Ҷумҳурии Тоҷикистон бахшида ба 30-солагии Конститутсияи Ҷумҳурии Тоҷикистон доир гардид. Дар ин хусус АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.

Муовини якуми Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Зарафо Қиёмзода ва дигар иштирокдорон доир ба марҳилаи таърихи таҳия ва қабули Конститутсияи Ҷумҳурии Тоҷикистон ва нақши он дар рушди қонунгузории мамлакат сухан намуданд.

Гуфта шуд, ки бо қабули Конститутсияи Ҷумҳурии Тоҷикистон мамлакат ба марҳилаи нави бунёдкорӣ ворид гардида, рукнҳои давлатдорӣ тақвият ёфтанд.

Конститутсияи Ҷумҳурии Тоҷикистон ҳамчун ҳуҷҷати сарнавиштсоз, ки ба низоми давлатсозӣ, зиндагонии босаодати халқ, ҳуқуқу озодиҳо, ҳифзи арзишҳои миллӣ, баробарӣ, кору таҳсил, эътиқоди динӣ ва ҳама паҳлуҳои соҳаҳои иқтисодию иҷтимоӣ ва фарҳангӣ равона гардидааст, барои ҳар шаҳрванд ва сокинони мамлакат санади сарнавиштсоз маҳсуб мешавад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон