Байни Агентии содироти Тоҷикистон ва Кумитаи рушди содироти Арабистони Саудӣ оид ба рушди содироти ғайринафтӣ Ёддошти тафоҳум ба имзо расид

ДУШАНБЕ, 28.11.2024 /АМИТ «Ховар»/. Байни Агентии содироти назди Ҳукумати Ҷумҳурии Тоҷикистон ва Кумитаи рушди содироти Арабистони Саудӣ оид ба рушди содироти ғайринафтӣ бо мақсади тақвият бахшидани ҳамкорӣ ва афзун намудани содироти маҳсулоти ватанӣ ба Арабистони Саудӣ Ёддошти тафоҳум ба имзо расонида шуд.

Тавре ба АМИТ «Ховар» дар Агентии содирот хабар доданд, Ёддошти тафоҳум дар шаҳри Риёз зимни ҷаласаи чоруми Комиссияи байниҳукуматии Тоҷикистон ва Арабистони Саудӣ оид ба масъалаҳои иқтисодӣ, тиҷоратӣ сармоягузорӣ, техникӣ ва фарҳангӣ дар ҳошияи Конфронси 28-уми байналмилалии сармоягузорӣ ба имзо расид.

Ҳамзамон дар ҳошияи конфронс директори Агентии содирот бо роҳбарони якчанд субъекти соҳибкории Арабистони Саудӣ мулоқот намуд. Зимни мулоқот ҷонибҳо масъалаҳои сармоягузорӣ барои таъсиси марказҳои логистикӣ ва ташкили корхонаҳои муштарак дар самти коркарди маҳсулоти кишоварзиро баррасӣ намуданд.

Ёдовар мешавем, ки ҳайати Тоҷикистон аз 24 то 27 ноябр дар Конфронси 28-уми байналмилалии сармоягузорӣ дар шаҳри Риёзи Арабистони Саудӣ  иштирок намуд.

АКС: Агентии содироти назди Ҳукумати Ҷумҳурии Тоҷикистон