Дар Коллеҷи омӯзгории шаҳри Душанбе даври якуми озмуни шаҳрии «Ту қалби Тоҷикистонӣ, Душанбе» доир шуд

ДУШАНБЕ, 03.11.2024 /АМИТ «Ховар»/. Дар Коллеҷи омӯзгории ба номи Хосият Махсумоваи Донишгоҳи давлатии омӯзгории Тоҷикистон ба номи Садриддин Айнӣ даври аввали озмуни «Ту қалби Тоҷикистонӣ, Душанбе» баргузор шуд, хабар медиҳад АМИТ «Ховар» бо истинод ба ин коллеҷ.

Озмун аз 1 октябр дар се давр оғоз гардида, то 15 декабр идома меёбад. Ҷамъбаст ва маросими ҷоизасупорӣ ба ғолибони даври ниҳоии озмун дар арафаи таҷлили Рӯзи пойтахт моҳи апрели соли 2025 баргузор мешавад.

Дар озмун донишҷӯёни факултетҳои муассиса аз рӯйи чор номинатсия — эҷоди шеъри беҳтарин дар васфи пойтахти Ҷумҳурии Тоҷикистон, қироати шеъри беҳтарин дар васфи шаҳри Душанбе, иҷрои суруди беҳтарин дар васфи пойтахт ва суруди беҳтарини гурӯҳӣ дар васфи пойтахти мамлакат иштирок намуда, ҳунару истеъдоди худро нишон доданд. Озмунро аъзои ҳакамон баҳогузорӣ намуда, беҳтаринҳоро ба даври ноҳиявӣ пешниҳод намуданд.

Озмуни «Ту қалби Тоҷикистонӣ, Душанбе» байни хонандагону донишҷӯёни муассисаҳои таҳсилоти миёнаи умумӣ, ибтидоӣ, миёна ва олии касбӣ, таълимгирандагони муассисаҳои таҳсилоти иловагии соҳаи маориф, санъат ва мусиқӣ, эҷодкорону ҳаваскорон ва намояндагони касбу кори гуногун, ки дар ҳудуди шаҳри Душанбе зиндагӣ, фаъолият ва эҷод менамоянд, баргузор мешавад.

Ҳадаф аз баргузории озмун дарёфт ва муаррифии чеҳраҳои нави суханвару сухандони дорои маҳорати баланди ровигию наттоқӣ ва сарояндагию овозхонӣ мебошад.

АКС: Коллеҷи омӯзгории ба номи Хосият Махсумова