Дар Маҷлиси намояндагон бахшида ба Рӯзи Президент ҳамоиш баргузор шуд

ДУШАНБЕ, 15.11.2024. /АМИТ «Ховар»/.  Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бахшида ба Рӯзи Президент ҳамоиш баргузор  гардид. Дар он таъкид карда шуд, ки корнома ва зиндагиномаи Пешвои миллат муҳтарам Эмомалӣ Раҳмон ба сарнавишти давлатсозӣ ва давлатдории навини тоҷикон пайванди абадӣ дорад.

Тавре ба АМИТ «Ховар» дар Маҷлиси намояндагон хабар доданд, Раиси Маҷлиси намояндагони Маҷлиси Олии Ҷумҳурии Точикистон Маҳмадтоир Зокирзода иброз намуд, ки  вақте ки мо дар бораи Рӯзи Президент ҳамчун ҷашни ифтихормандию самимият сухан меронем, пеши назарамон хизматҳои мондагори Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон падидор мешаванд.

«Агар аз рӯйи дарки ҳақиқат хизматҳои қиёснашавандаи Сарвари давлатро бо амалҳои созандагиву бунёдкориашон пеши назар орем, қобилияти баланди кордонӣ ва касбияти сиёсии ин шахсияти нотакрору беназир ҳамчун Пешвои миллат инъикос мегардад. Воқеан ҳам, хизмату фидокорӣ ва ҷоннисориҳои Сарвари давлат барои ҳар фарди худшиносу миллатдӯст ва ватандӯсту ватанпарвар сабақи ибрат аст»,-афзуд ӯ.

Қарзи виҷдониву имонии мо тақозо менамояд, ки дар иртибот ба ҳама ин заҳмату талошҳо, ғамхориву дастгирӣ, созандагиву бунёдкорӣ ва пешравиҳо бо дарки худогоҳиву зиракии сиёсӣ дар атрофи Пешвои миллат муҳтарам Эмомалӣ Раҳмон аз ҳарвақта дида бештар муттаҳид бошем ва бо ин роҳ Ватани маҳбубамонро боз ҳам ободу зеботар ва пешрафтаю маъруфтар гардонему якпорчагии онро чун гаҳвараки чашм ҳифз намоем. Аз ин ҷост, ки имрӯз ҷаҳониён таҷрибаву ташаббус ва модели давлатсозӣ ва давлатдории Президенти моро меомӯзанду ба дигарон тавсия медиҳанд.

Маҳмадтоир Зокирзода иброз намуд, ки тамоми фаъолияти пурмаҳсули сиёсии Пешвои миллат ба ҳайси Сарвари давлати Тоҷикистони соҳибистиқлол мактаби бузурги ҷасорату мардонагӣ, одамияту таҳаммулпазирӣ, тамаддунсозиву илмомӯзӣ ва ватандӯстиву ваҳдатгароӣ аст.

«Ба таври мухтасар Рӯзи Президенти Ҷумҳурии Тоҷикистонро ҷашни бузурги миллӣ, рамзи муҳаббату вафодорӣ, тантанаи хираду мардумсолорӣ ва арҷгузорӣ ба арзишҳои демократӣ ном бурдан мумкин аст»,-изҳор гардид дар ҳамоиш.

Таҷлили Рӯзи Президент рамзи садоқат ва вафодорӣ ба Ватан, Президент ва миллат буда, нишонаи шукргузорӣ аз озодию соҳибихтиёрӣ ва эҳтиром гузоштан ба арзишҳои давлатдорию соҳибистиқлолӣ арзёбӣ мегардад.

АКС: Маҷлиси намояндагони Маҷлиси Олии Ҷумҳурии Точикистон