Дар Риёз машваратҳои сиёсӣ байни вазоратҳои корҳои хориҷии Ҷумҳурии Тоҷикистон ва Арабистони Саудӣ баргузор шуданд

ДУШАНБЕ, 22.11.2024 /АМИТ «Ховар»/. 20 ноябр дар шаҳри Риёз даври сеюми машваратҳои сиёсӣ байни  вазоратҳои корҳои хориҷии Ҷумҳурии Тоҷикистон ва Подшоҳии Арабистони Саудӣ баргузор гардид. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Зимни нишаст ҷонибҳо вобаста ба ҳолати кунунӣ ва дурнамои густариши ҳамкории мутақобили судманди Тоҷикистон ва Арабистони Саудӣ дар заминаҳои сиёсӣ, иқтисодию тиҷоратӣ, сармоягузорӣ, илму фарҳанг ва амниятӣ табодули афкори созанда анҷом доданд.

Ҳамчунин робитаҳои шарикӣ дар доираи созмонҳои байналмилалию минтақавӣ дар меҳвари гуфтугӯи ҷонибҳо қарор дошт.

Машваратҳо таҳти роҳбарии муовини Вазири корҳои хориҷии Ҷумҳурии Тоҷикистон Фаррух Шарифзода ва муовини якуми вазири корҳои хориҷии Подшоҳии Арабистони Саудӣ Валид ибни Абдулкарим Ал-Хурайҷӣ доир шуданд.

АКС: Вазорати корҳои хориҷии Ҷумҳурии Тоҷикистон