Дар Женева имконоти соҳаи кишоварзии Тоҷикистон муаррифӣ шуданд

ДУШАНБЕ, 14.11.2024 /АМИТ «Ховар»/. 12 ноябр Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария,   Намояндаи доимии Ҷумҳурии Тоҷикистон дар назди Шуъбаи Созмони Милали Муттаҳид ва дигар ташкилоти байналмилалӣ дар Женева Шараф Шерализода дар ҷаласаи 79-уми Гурӯҳи кории Комиссияи иқтисодии Созмони Милали Муттаҳид барои Аврупо (UNECE) оид ба стандартҳои сифати маҳсулоти кишоварзӣ иштирок намуд.

Тавре АМИТ «Ховар» бо истинод ба Сафорати Ҷумҳурии Тоҷикистон дар Конфедератсияи Швейтсария хабар медиҳад, Шараф Шерализода вобаста ба дастовардҳои соҳа ва имконияти рушди ҳамкории минтақавӣ, аз ҷумла бартараф намудани монеаҳои техникӣ, содагардонии расмиёти савдои маҳсулоти кишоварзӣ тавассути ташкили долонҳои «сабз» ва таъсиси марказҳои логистикӣ, зарурати ҷорӣ намудани стандартҳо ва ҳамгироии онҳо сухан намуд.

Инчунин дар ҳошияи ҷаласа намоишгоҳи маҳсулоти кишоварзии давлатҳо баргузор гардид, ки дар он меваҳои тару тоза ва хушкмеваҳои Ҷумҳурии Тоҷикистон муаррифӣ карда шуд.

АКС: Сафорати Ҷумҳурии Тоҷикистон дар Конфедератсияи Швейтсария