Кумитаи ҳолатҳои фавқулода ва мудофиаи граждании Тоҷикистон ба низоми автоматии алоқа мегузарад

ДУШАНБЕ, 12.11.2024. /АМИТ «Ховар»/. Бо мақсади таъсиси Низоми ягонаи автоматикунонидаи алоқа дар Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон таҷҳизоти навтарини алоқа ва дастгоҳҳои назорати видеоӣ харидорӣ гардид.

Тавре дар Кумитаи ҳолатҳои фавқулода ва мудофиаи гражданӣ ба АМИТ «Ховар» хабар доданд, барои омӯзонидани ин таҷҳизот ба кормандон машваратҳои омӯзишӣ оғоз шуданд.

Ин воситаҳои техникӣ имкон медиҳанд, ки алоқаи савтиву овозӣ, иртиботи видеоӣ, паёмҳои матнӣ, ҷойгиршавӣ ва дигар воситаҳои иртибот дар низоми ягона ҷамъоварӣ, иваз ва коркард шаванд. Он интиқоли босуръати маълумотро байни компютерҳо ва дигар дастгоҳҳои дохили шабака таъмин мекунад, ки ба ин восита робита байни сохторҳои минтақавӣ беҳтар мешавад.

Ба кормандон нармафзори системавӣ, низомҳои дар серверҳо насбшуда, принсипҳои асосии кор, имконияти система, таркиби таҷҳизот, назораткунандаҳои телефонҳои «ROIP, SIP», камераҳои «SIP CCTV», радиостансияҳо, пайвастшавӣ, тавсифи нармафзор, нақшҳои маъмури низом, оператор, қоидаҳои умумии кор ва нигоҳдорӣ омӯзонида мешаванд.

Ёдовар мешавем, ки ин таҷҳизот дар доираи татбиқи минбаъдаи Лоиҳаи миллии идораи хатари офатҳои табиӣ барои воҳидҳои Кумитаи ҳолтҳои фавқулода ва мудофиаи гражданӣ харидорӣ гардидааст.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон