Намояндаи Тоҷикистон дар ҷаласаи Кумитаи роҳбарикунандаи байниҳукуматии пешсафии глобалӣ оид ба обанборҳои насосӣ иштирок намуд

ДУШАНБЕ, 14.11.2024 /АМИТ «Ховар»/. 14 ноябр дар шаҳри Бокуи Озарбойҷон дар ҳошияи Конфронси 29-уми ҷонибҳои Конвенсияи қолабии Созмони Милали Муттаҳид оид ба тағйирёбии иқлим ҷаласаи Кумитаи роҳбарикунандаи байниҳукуматии пешсафии глобалӣ оид ба обанборҳои насосӣ баргузор шуд, ки дар он муовини якуми Вазири энергетика ва захираҳои оби Ҷумҳурии Тоҷикистон Ҷамшед Шоимзода иштирок намуд.

Тавре АМИТ «Ховар» бо истинод ба Вазорати энергетика ва захираҳои об хабар медиҳад, Ҷамшед Шоимзода аз иқтидори энергетикии Ҷумҳурии Тоҷикистон ёдовар шуда, вобаста ба аҳамияти гидроэнергетика дар шароити тағйирёбии иқлим ибрози андеша  намуд.

Гуфта шуд, ки Неругоҳи барқи обии «Роғун» аз ҷумлаи бузургтарин неругоҳҳои ҷаҳон ба ҳисоб рафта, на танҳо амнияти энергетикии Тоҷикистонро таъмин менамояд, балки дар афзоиши ҳаҷми содирот ба мамлакатҳои ҳамсоя низ саҳм хоҳад гузошт.

Дар ҷаласа изҳори омодагии Тоҷикистон барои ҳамкории зич бо Кумитаи роҳбарикунандаи байниҳукуматии пешсафии глобалӣ оид ба обанборҳои насосӣ баён гардид.

АКС: Вазорати энергетика ва захираҳои оби Ҷумҳурии Тоҷикистон