«ПРЕЗИДЕНТИ МО — ҒАМХОРИ МО». Бори аввал байни кӯдакони имконияташон маҳдуди шаҳри Душанбе озмун доир шуд

ДУШАНБЕ, 15.11.2024. /АМИТ «Ховар»/. Дар Муассисаи давлатии «Маркази кӯдакон ва наврасони шаҳри Душанбе» нахустин маротиба таҳти унвони «Президенти мо — ғамхори мо» байни кӯдакони имконияташон маҳдуди шаҳри Душанбе озмуни шаҳрӣ баргузор гардид. Дар ин хусус ба АМИТ «Ховар» дар Сарраёсати маорифи шаҳри Душанбе хабар доданд.

Озмун аз рӯи чор номинатсия: «Рақс», «Рассомӣ», «Шашка» ва «Шоҳмот» ташкил шуда, дар он 46 кӯдаки маъюб иштирок намуд.

Озмун бо мақсади ҳавасмандгардонӣ ва дастгирии кӯдакони имконияташон маҳдуди шаҳри Душанбе дар доираи дастуру супоришҳои Пешвои миллат муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ ба хотири тарбияи кӯдакону наврасон дар руҳияи ватандӯстию ватанпарастӣ ва худшиносии миллӣ баргузор гардид.

Озмуни шаҳрии «Президенти мо-ғамхори мо» бори нахуст аст, ки аз ҷониби Муассисаи давлатии «Маркази кӯдакон ва наврасони шаҳри Душанбе» баргузор мегардад. Умед аст, ки солҳои минбаъда низ чунин озмунҳо бештару беҳтар ба роҳ монда мешаванд.

Бояд гуфт, ки давлату Ҳукумати мамлакат, хосса Пешвои миллат ба  таълиму тарбияи насли наврас, бахусус кӯдакони имконияташон маҳдуд таваҷҷуҳи зиёд зоҳир намуда, пайваста нисбат ба ин гурӯҳи ҷомеа ғамхорӣ менамоянд.

Хотиррасон менамоем, ки озмуни шаҳрии «Президенти мо — ғамхори мо» имрӯз дар муассиса дар ҳошияи таҷлили Рӯзи Президенти Ҷумҳурии Тоҷикистон бо шукуҳу шаҳомати хосса ҷамъбаст гардида, ғолибон бо Сипоснома ва туҳфаҳои хотирмон қадрдонӣ мегарданд.

АКС: Маркази кӯдакон ва наврасони шаҳри Душанбе