Ситораҳои футбол бо мухлисони худ дар толорҳои алоқа вохӯрданд

ДУШАНБЕ, 15.11.2024 /АМИТ «Ховар»/. Мизоҷони чор толори алоқаи ширкати «МегаФон Тоҷикистон» дар шаҳри Душанбе имкони мулоқот бо бозингарони дастаи мунтахаби миллиро пайдо намуданд. Як рӯз пас аз пирӯзии барҷаста бар дастаи Непал Зоир Ҷӯрабоев, Амадонӣ Камолов, Аҳтам Назаров, Манучеҳр Сафаров, Рустам Соиров, Парвиз Умарбоев, Рустам Ятимов ва инчунин қаҳрамони мусобиқаи гузашта – нимҳимоятгар Шервонӣ Мабатшоев, ки ба дарвозаи Непал аз чор ду голашро зада буд, барои мулоқот бо мухлисони худ омаданд. 

«Ин тасаввурнопазир аст! Ҳеҷ гоҳ фикр намекардам, ки бозигарони тими мунтахабро аз пеш дида, ҳатто бо онҳо акс гирифта метавонам. Худи ҳозир акси бо онҳо гирифтаамро ба шабакаҳои иҷтимоӣ мегузорам, бигзор дӯстонам бо ман хурсандӣ кунанд!» – таассуроти худро баён намуд Азамат, мизоҷи толори алоқа дар хиёбони Рӯдакӣ 89.

«Доим орзу мекардам, ки бо ин футболбозон мулоқот намоям. Тарзи бозии Рустам ва Зоир бароям хеле писанд аст, ҳангоми мулоқот бо онҳо ман билохира имкон пайдо намудам, ки ин гапро ба онҳо рӯ ба рӯ бигӯям ва дасташонро фушурам. Ин беҳтарин иқдом, беҳтарин туҳфа барои мухлисони онҳо аст!», – илова намуд Абдулазиз, ки рӯзи иқдом дар толори оператор, воқеъ дар кӯчаи Шамсӣ 23 меҳмон шуда буд.

Дар ҳар яке аз чор толор сад мизоҷи аввалин аз ширкати «МегаФон Тоҷикистон» туҳфаҳои нодир – тӯбҳои футболро бо соядастҳои бозингарони дастаи мунтахаб ба даст оварданд. Сокинон дигар имконияти гувороро низ фаромӯш нахоҳанд кард: дар толорҳои оператор онҳо имкон доштанд, ки туҳфачаҳои хотиравиро аз оператор ба даст оварда, рақамҳои мақомноки тиллоиро бо тахфифи калон бихаранд.

«Акнун ман рақами аҷоиб бо чорто чор дар охир ва тӯб бо соядасти Шервонӣ Мабатшоев дорам.  Рӯзи басе бобарор шуд!», – бо табассум изҳор дошт яке аз иштирокчиёни иқдом Мадина. Мадина гуфт, ки ӯ бо дӯстонаш пахши мусобиқаҳои футболро бо иштироки Алишер зиёд тамошо мекунад ва мехоҳад бозӣ бо Афғонистонро, ки 19 ноябр доир мешавад, пайгирӣ намояд.

«Имрӯз он қадар чеҳраҳои хушҳолеро дидем, ки барои худ хулоса баровардем: идеяи ташкили вохӯрӣ бо ситораҳои футбол комилан дуруст буд. Мутмаинам, ки акнун сокинони боз ҳам бештари ҷумҳурӣ дастаи мунтахаби моро мухлисӣ намуда, иштирокчиёни ҷавони иқдом касбу кори варзишгариро орзу хоҳанд кард»,- изҳор дошт дар ҷамъбаст директори раёсати минтақавӣ дар шаҳри Душанбе ва ноҳияҳои тобеи ҷумҳурии ширкати «МегаФон Тоҷикистон» Далер Наимов.

АКС:ширкати «МегаФон Тоҷикистон»