Бахшида ба 30-солагии таъсиси Ҳизби Халқии Демократии Тоҷикистон дар ноҳияи Восеъ ҳамоиш доир гардид

ВОСЕЪ, 11.12.2024. /АМИТ «Ховар»/. Дар ноҳияи Восеъ бахшида ба 30-солагии таъсиси Ҳизби Халқии Демократии Тоҷикистон ҳамоиши сиёсӣ-фарҳангӣ баргузор шуд.

Иброз гардид, ки давоми 30 сол Ҳизби Халқии Демократии Тоҷикистон таҳти сарварии Пешвои миллат, Раиси Ҳизби Халқии Демократии Тоҷикистон муҳтарам Эмомалӣ Раҳмон собит сохт, ки комилан мардумӣ буда, барои зиндагии шоистаи мардум хизмат мекунад. Воқеан, имрӯзҳо Ҳизби Халқии Демократии Тоҷикистонро дар ҷомеа ҳамчун ҳизби ормонҳои миллӣ, таҳкимбахшандаи сулҳу ваҳдати миллӣ, бунёдкору созанда, тамаддунофар ва эҳёгар мешиносанд.

Раиси Кумитаи иҷроияи Ҳизби Халқии Демократии Тоҷикистон дар вилояти Хатлон Ҷамшед Саидзода изҳор дошт, ки «марому мақсади Ҳизби Халқии Демократии Тоҷикистон эъмори давлати демократӣ, ҳуқуқбунёд, дунявию иҷтимоӣ буда, барои ҳифзи дастовардҳои истиқлолият, фароҳам овардани зиндагии босаодати мардум, ҳифзи ҳуқуқу озодиҳои шаҳрвандон давоми 30 соли фаъолият пайваста талош намуд ва ин раванд боз ҳам идома дорад».

Фаъолияти созандаи ҳизб ба сиёсати хирадмандонаи бунёдгузори он- Пешвои миллат муҳтарам Эмомалӣ Раҳмон асос ёфтааст, ки имсол 30-солагии ин ҳизби созанда ва бунёдкор бо шукуҳи тоза ҷашн гирифта мешавад.

АКС: Кумитаи иҷроияи Ҳизби Халқии Демократии Тоҷикистон дар вилояти Хатлон