Дар Душанбе бахшида ба Рӯзи байналмилалии волонтёрон барномаҳои фарҳангӣ-маърифатӣ доир шуданд

Декабрь 5, 2024 16:50

ДУШАНБЕ, 05.12.2024. /АМИТ «Ховар»/. Имрӯз дар шаҳри Душанбе бахшида ба Рӯзи байналмилалии волонтёрон (5 декабр) таҳти унвони «Хайрхоҳӣ шараф аст-волонтёр мешавем!» барномаҳои маърифатӣ-фарҳангӣ ва аксияву ҳамоишҳои гуногун баргузор шуда, зимни он 40 нафар ихтиёриёни фаъол қадрдонӣ гардиданд, иттилоъ медиҳад АМИТ «Ховар».

Таъкид шуд, ки таҷлили Рӯзи байналмилалии волонтёрон дар Тоҷикистони соҳибистиқлол далели таваҷҷуҳи Ҳукумати мамлакат, бахусус Президенти Ҷумҳурии Тоҷикистон муҳтарам Эмомалӣ Раҳмон нисбат ба ихтиёриён ва фаъолияти содиқонаву фидокоронаи онҳо мебошад.

«Воқеан волонтёрӣ — мактаби бузурги далерию шуҷоат, тавоноӣ, ҳушёрию доноӣ ва руҳияи солим буда, барои ташаккули ҳамаҷонибаи наврасону ҷавонон ва инсонҳо мусоидати фаъол менамояд. Зеро ҳамон шахсе волонтёр шуда метавонад, ки дили гарму нияти нек, ташаббусҳои наву идеяҳои ҷолиб дошта, некхоҳу некбин бошад»,- иброз намуд Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода зимни чорабинӣ.

Бояд таъкид намуд, ки хайрхоҳӣ, амали нек кардан ё ҳаракати волонтёрӣ дар замони муосир чизи нав нест. Зеро миллати тамаддунофари тоҷик аз қадим ҳамеша бо роҳи ҳашар ва дар якҷоягӣ барои ободии деҳу дастгирии шахсони ниёзманду барҷомонда дасти ёрӣ дароз мекарданд. Аз ин хотир ҷавонону наврасонро мебояд дар пайравӣ ба гузаштагони соҳибтамаддун ин хайрхоҳиро, ки дар замони муосир бо шаклҳои нав зуҳур кардааст, пайгир бошанд ва давомдиҳандаи корҳои неки аҷдодон гарданд.

Ба андешаи волонтёри фаъоли Ташкилоти ҷамъиятии «Пайравони Пешвои миллат» Шабнам Шамсиддинзода, волонтёр  шахсе мебошад, ки ихтиёран ва бо интихоби озод вақт, кор ва малакаи худро бемузд ба манфиати ҷомеа пешниҳод менамояд.

«Фаъолияти волонтёрӣ самт ва ҷанбаҳои зиёдеро фаро гирифта, то имрӯз мутахассисони ҷавонро барои соҳаҳои гуногун омода намудааст. Ҳамзамон ба онҳо хислатҳои неки инсонӣ, ба мисли инсондӯстӣ, якдигарфаҳмӣ, дастгирии ҳамдигар, меҳру шафқат нисбат ба якдигар ва ростию накукорӣ омӯзонидааст»,- мегӯяд ӯ.

Волонтёри дигари ин ташкилот Аҳдия Бобоалиева иброз намуд, ки “имрӯз бо ифтихор гуфта метавонем, ки сафи мо — волонтёрон рӯз то рӯз афзуда, аз он дарак медиҳад, ки кору амали  мо нек аст. Ман дар кадом соҳа ва дар кадом синне набошам, ҳамеша волонтёр ҳастам ва хоҳам буд. Чун андешаи ман ин аст, ки рисолати ҳар инсон,  пеш аз ҳама, ба мардум некхоҳ будану ба онҳо ҳамвора дасти кумак дароз кардан аст”.

Ба андешаи волонтёр Амина Бобозода, ҷавононе, ки имрӯз фаъолияти волонтёрӣ доранд, метавонанд худро дар дилхоҳ самт санҷишу озмоиш намоянд. Фаъолияти волонтёрӣ барои ҷавонон имконияти  мусоиди такмилу ташаккулро фароҳам овард. «Зеро волонтёрон дар баробари хизмати содиқона ба ҷомеа бо ҳунару дониши намунавии худ Тоҷикистонро дар миқёси ҷаҳон муаррифӣ менамоянд»,- гуфт ӯ.

Ёдовар мешавем, ки соли  1985 бо пешниҳоди Ассамблеяи генералии Созмони Милали Муттаҳид 5 декабр Рӯзи волонтёрон (ихтиёриён) муқаррар гардид.

Зарангези ЛАТИФ,
АМИТ «Ховар»

АКС: АМИТ «Ховар»

Декабрь 5, 2024 16:50

Хабарҳои дигари ин бахш

Дар Коллеҷи технологии шаҳри Душанбе 5 синфхонаи иловагӣ ба истифода дода мешавад
Дар назди Коллеҷи тиббии ҷумҳуриявӣ бинои нави клиника ва дармонгоҳ бунёд мегардад
Соли равон 37 муассисаи таҳсилоти ибтидоии касбӣ таъмир ва навсозӣ мегардад
Кормандони Кумита оид ба таҳсилоти ибтидоӣ ва миёнаи касбӣ суханронии Сарвари давлатро ба муносибати Рӯзи дониш якҷоя тамошо намуданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд
«Барномаи рушди соҳаҳои таҳсилоти ибтидоӣ ва миёнаи касбии Ҷумҳурии Тоҷикистон барои солҳои 2026-2030» қабул гардид
Татбиқи лоиҳаҳои сармоягузорӣ дар соҳаи таҳсилоти ибтидоӣ ва миёнаи касбӣ бо намояндаи Бонки Осиёии рушд баррасӣ гардид
Дар Душанбе оид ба татбиқи иммунизатсия бар зидди вируси папилломаи одам машварати омӯзишӣ оғоз шуд
Татбиқи лоиҳаи «Беҳтарсозии малакаҳои касбӣ ва имконияти бокортаъминшавӣ» баррасӣ гардид
НЕЪМАТЕ ХУШТАР ЗИ ИСТИҚЛОЛ НЕСТ! Муҳимтарин омили таҳкими истиқлоли Тоҷикистон густариши худшиносию худогоҳии миллӣ аст
Сиёсати иҷтимоии Пешвои миллат такягоҳи суботи иҷтимоӣ ва рушди устувори давлат мебошад
Беш аз 15 ҳазор оилаҳои дар минтақаи зериобшавандаи НБО «Роғун» қарордошта бо манзили доимии зист ва қитъаи замини наздиҳавлигӣ таъмин гардиданд