Дар Душанбе таҳти унвони «Нақши занон дар муқовимат ба коррупсия» конференсияи ҷумҳуриявӣ доир гардид

ДУШАНБЕ, 06.12.2024. /АМИТ «Ховар»/. Имрӯз дар Кумитаи кор бо занон ва оилаи назди Ҳукумати Ҷумҳурии Тоҷикистон бахшида ба Рӯзи байналмилалии мубориза бар зидди коррупсия (9 декабр) таҳти унвони «Нақши занон дар муқовимат ба коррупсия» конференсияи ҷумҳуриявӣ баргузор гардид.

Тавре мухбири АМИТ «Ховар» хабар медиҳад, дар конференсия иброз гардид, ки ҳадафи асосии ҳамоиш таҳлили нақши занон дар муқовимат ба коррупсия, таҳкими мавқеи онҳо дар ҷомеа ва баланд бардоштани сатҳи огоҳӣ барои пешгирии ин мушкилот мебошад.

Таъкид гардид, ки дар Ҷумҳурии Тоҷикистон аз рӯзҳои аввали ба даст овардани Истиқлолияти давлатӣ масъалаи муқовимат ба коррупсия дар меҳвари сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон қарор дошта, Пешвои миллат бартараф ва коҳиш додани шиддати ин амали номатлубро дар ҳар суханронию мулоқот махсусан таъкид менамоянд.

Пешвои миллат дар яке аз суханрониҳояшон чунин таъкид доштаанд: «Коррупсия яке аз монеаҳои ҷиддии рушди босуботи мамлакат буда, метавонад боиси коҳиш ёфтани эътибору обрӯйи давлат дар арсаи байналмилалӣ ва норозигии шаҳрвандон аз фаъолияти сохтору мақомоти давлатӣ гардад».

Нақши занон дар таҳкими сиёсати зиддикоррупсионӣ назаррас арзёбӣ гардида, барои баланд бардоштани мақому манзалати онҳо дар ҷомеа тамоми талошҳо ва тадбирҳои шоиста амалӣ мегарданд.

Таъкид гардид, ки муқовимат ба коррупсия ва коҳиш додани сатҳи он аз бисёр омилҳо, ба монанди ҳамдигарфаҳмӣ, савияи баланди донишу маърифати ҳуқуқӣ ва фаъолнокии ҳар фарди ҷомеа дар муносибати оштинопазир бо ин амали номатлуб вобаста аст.

Ёдовар мешавем, ки Ҷумҳурии Тоҷикистон ҳамчун иштирокчии фаъоли раванди ҷаҳонии муқовимат ба коррупсия «Конвенсияи Созмони Милали Муттаҳид бар зидди коррупсия»-ро 25 сентябри соли 2006 ба имзо расонида, 16 апрели соли 2008 тасдиқ намуд. Дар ин бобат меъёрҳои қонунгузории мамлакат ба талаботи ин Конвенсия мутобиқ гардонида шуданд. Дар ин замина чандин санадҳои меъёрии ҳуқуқӣ ва барномаю стратегияҳои давлатӣ қабул гардиданд.

АКС: Кумитаи кор бо занон ва оилаи назди Ҳукумати Ҷумҳурии Тоҷикистон