Доир ба мақомоти гумрук ва нақши он дар таъмини бехатарии иқтисодӣ конференсияи байналмилалӣ баргузор гардид

ДУШАНБЕ, 05.12.2024 /АМИТ «Ховар»/. Дар Донишгоҳи давлатии молия ва иқтисоди Тоҷикистон дар мавзуи «Мақомоти гумрук ва нақши он дар таъмини бехатарии иқтисодӣ» конференсияи байналмилалии илмӣ-амалӣ баргузор шуд.

Тавре АМИТ «Ховар» бо истинод ба ин донишгоҳ хабар медиҳад, дар конференсия мутахассисону коршиносон аз Русия ва Узбекистон ба таври ҳузурӣ ва маҷозӣ иштирок намуданд.

Иброз гардид, ки маҳз бо шарофати Истиқлолияти давлатӣ ва таваҷҷуҳи хоссаи Президенти Тоҷикистон муҳтарам Эмомалӣ Раҳмон Хадамоти гумруки назди Ҳукумати Ҷумҳурии Тоҷикистон ба сохтори калидию мукаммали давлатӣ ва такягоҳи буҷети ҷумҳурӣ табдил гардид. Саҳми Донишгоҳи давлатии молия ва иқтисоди Тоҷикистон барои тайёр намудани мутахассисони дараҷаи олӣ дар мақомоти гумрук аз назар дур нест. Ҳамасола донишҷӯёни ин самт донишгоҳро бо дониши хубу аъло хатм намуда, мутахассисони варзидаи соҳаи гумрук мегарданд.

Дар иқтисодиёт мақомоти гумрук нақши хеле калон мебозад. Аз кори мақомоти гумрук на танҳо таъмини молиявии соҳаҳои гуногуни фаъолияти давлат, балки бехатарии иқтисодӣ, фарҳангӣ, идеологӣ ва экологии он вобаста аст.

Дар конференсия устодони филиали Ростови академияи гумруки Русия, Донишгоҳи давлатии Тирмиз ва Донишгоҳи соҳибкорӣ ва педагогикаи Деҳнави Узбекистон оид ба мавзуи матраҳшаванда ибрози андеша намуданд.

АКС: Донишгоҳи давлатии молия ва иқтисоди Тоҷикистон