Кумитаи ҳолатҳои фавқулода ва мудофиаи граждании Тоҷикистон соҳиби 15 техникаи вазнин барои корҳои наҷот гардид

ДУШАНБЕ, 25.12.2024. /АМИТ «Ховар»/. 24 декабр дар доираи лоиҳаи муштараки миллии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва Бонки Осиёии Рушд оид ба офатҳои табиӣ ба ҷузъу томҳои Кумитаи ҳолатҳои фавқулода ва мудофиаи гражданӣ 15 намуд техникаи вазнин, махсус ва наҷот супорида шуд. Дар ин хусус АМИТ «Ховар» бо истинод ба ин кумита хабар медиҳад.

Иттилоъ  дода шуд, ки бо мақсади татбиқи минбаъдаи лоиҳаи Кумитаи ҳолатҳои фавқулода ва мудофиаи гражданӣ ва Бонки ҷаҳонӣ «Беҳдошти омодагӣ ва устуворӣ ба офатҳои табиӣ дар Тоҷикистон» ҳамзамон 4 ҳавопаймои бесарнишин супорида шуд, ки се адади он барои таҳлил ва мониторинги минтақаҳои хавфнок пешбинӣ шудааст. Яке аз ин ҳавопаймоҳои бесарнишин бо камераи дорои тасвири инфрасурх ва ҳароратӣ барои шинохтани ҳалокшудагон дар ҳолатҳои фавқулода муҷаҳҳаз гардидааст.

Тамоми воситаҳои техникӣ барои корҳои фаврӣ ва самарабахши рафъи оқибатҳои офатҳои табиӣ, анҷом додани корҳои наҷот ва дигар амалҳои таъхирнопазир, инчунин ба даст овардани иттилооти зарурӣ ва дақиқ дар мавриди вазъияти системаи табиию саноатӣ, хусусан дар навоҳии кӯҳистон, тарҳрезӣ ва қабули қарорҳои саривақтӣ вобаста ба пешгирии оқибатҳои эҳтимолии ҳолатҳои фавқулода ва расонидани ёрии тиббӣ пешбинӣ шудаанд.

Таъкид гардид, ки ин таҷҳизот, бешубҳа, ба наҷот додани ҷони одамони зиёд, осон намудани кори кормандони наҷот ҳангоми гузаронидани чорабиниҳои фавқулодаи кумакрасонӣ ва тадбирҳои пешгирикунанда мусоидат мекунанд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон