Муҳокимаи парлумонӣ дар Маҷлиси намояндагон

ДУШАНБЕ, 03.12.2024. /АМИТ «Ховар»/.  Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бо иштироки роҳбарони вазорату кумитаҳои дахлдори мамлакат муҳокимаи парламентӣ «Оид ба иҷрои Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2024» дар 9 моҳи соли 2024 баргузор гардид. Дар ин хусус ба АМИТ «Ховар» дар Маҷлиси намояндагон хабар доданд.

Таъкид шуд, ки омилҳои имрӯзаи ноустувории иқтисодии ҷаҳонӣ моро водор месозанд, ки оид ба пешгирӣ намудани таъсири онҳо ба иқтисодиёти миллӣ дар ҳамкорӣ бо сохторҳои марбутаи мамлакат тадбирҳои зарурӣ андешем.

Дар шароити буҳрони ҷаҳонии молиявию  иқтисодӣ манбаи асосие, ки метавонад ҳадафҳои стратегӣ ва иҷтимоии мамлакатро таъмин намояд, буҷети давлатӣ мебошад.

Дар ин замина вазифаи тамоми вазорату идораҳои аз буҷет маблағгузоришаванда аз он иборат аст, ки хароҷоти мақсадноку шаффофи маблағҳои буҷетӣ, назорат ва риояи қатъии интизоми молиявиро таъмин намоянд.

Барои амалӣ намудани ин мақсад пешбурди сиёсати устувори буҷету андоз ва иҷрои барзиёди он, ҷалби захираҳои иловагии молиявӣ, зиёд намудани даромадҳои буҷети ҷумҳуриявӣ, роҳ надодан ба хароҷоти иловагии бесамар ва баланд бардоштани интизоми молиявӣ дар доираи стратегияву барномаҳои давлатӣ имконпазир мебошад.

Дар интиҳои муҳокимаи парламентӣ баъди музокироти вакилони мардумӣ бо масъулини соҳа бо назардошти таклифу пешниҳодҳое, ки дар маърузаҳо иброз гардиданд, тавсияҳои дахлдор қабул шуданд.

АКС: Маҷлиси намояндагони Маҷлиси Олии Ҷумҳурии Тоҷикистон