Дар Ҳамоиши тиҷоратӣ, сармоягузорӣ ва гардишгарии Тоҷикистон ва Эрон иқтидори энергетикии Тоҷикистон муаррифӣ шуд

ДУШАНБЕ, 18.01.2025 /АМИТ «Ховар»/ Тибқи таҳлилҳо, иқтидори аз лиҳози иқтисодӣ асосноки офтобӣ дар Тоҷикистон 369 600 МВт ва бодӣ 4 485 МВт-ро ташкил медиҳад. Ин нуктаро  Вазири энергетика ва захираҳои оби Ҷумҳурии Тоҷикистон Далер Ҷумъа 16 январ дар  Ҳамоиши тиҷоратӣ, сармоягузорӣ ва гардишгарии Ҷумҳурии Тоҷикистон ва Ҷумҳурии Исломии Эрон, ки дар доираи сафари давлатии Президенти Ҷумҳурии Исломии Эрон муҳтарам Масъуд Пизишкиён ба Ҷумҳурии Тоҷикистон баргузор гардид, иброз дошт.

Ба АМИТ «Ховар» дар  Вазорати энергетика ва захираҳои оби Тоҷикистон иттилоъ доданд, ки Далер Ҷумъа  аз захираи бузурги гидроэнергетикии Ҷумҳурии Тоҷикистон ёдовар шуда, гуфт, ки мамлакати мо ҳамзамон дорои захираҳои бузурги энергияи офтобӣ ва бодӣ низ мебошад, ки то кунун истифода нашудаанд.

«Дар ин замина иштироки ширкатҳои эронӣ дар самти бунёд ва баҳрабардории неругоҳҳои барқи обии хурду бузург, неругоҳҳои захиракунандаи об, ҳамзамон неругоҳҳои барқи офтобӣ ва бодӣ дар Тоҷикистон ба манфиати кори ҷонибҳо дониста мешавад», — афзуд Вазири энергетика ва захираҳои оби Тоҷикистон.

Ёдовар мешавем, ки Ҳамоиши тиҷоратӣ, сармоягузорӣ ва гардишгарии Тоҷикистон ва Эрон 16 январ бо муколамаи намояндагони бахши хусусии ҷонибҳо оғоз ёфт. Дар он доираҳои соҳибкории Тоҷикистон ва Эрон маҷмуи масъалаҳои марбут ба таҳкими ҳамкории иқтисодию сармоягузории Тоҷикистон ва Эронро  баррасӣ намуданд.       

АКС: Вазорати энергетика ва захираҳои оби Тоҷикистон