Дар Бонки миллии Тоҷикистон дар мавзуи «Нақши ҷавонон дар таҳкими Истиқлоли давлатӣ» ҳамоиш доир гардид

ДУШАНБЕ, 14.01.2025 /АМИТ «Ховар»/. Президенти Ҷумҳурии Тоҷикистон муҳтарам Эмомалӣ Раҳмон ҷавононро қувваи асосии пешбарандаи ҷомеа ҳисобида, ҳалли масъалаҳои вобаста ба зиндагӣ ва таҳсилу фаъолияти онҳоро самти афзалиятноки сиёсати иҷтимоии давлат ва ҳукумат муайян намудаанд. Чунин гуфта шуд дар ҳамоиши низоми бонкии мамлакат зери шиори «Нақши ҷавонон дар таҳкими Истиқлоли давлатӣ», ки бо ташаббуси Шурои ҷавонони Бонки миллии Тоҷикистон ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Душанбе баргузор гардид. Дар ин хусус ба АМИТ «Ховар» дар Бонки миллии Тоҷикистон иттилоъ доданд.

Дар ҳамоиш иброз гардид, ки ҳадафи ин ҷамъомад ифодаи мавқеи устувори ҷавонон дар рушди иқтисодию иҷтимоӣ ва сиёсии мамлакат мебошад. Пешвои миллат ҳамеша таъкид менамоянд, ки ҷавонон бояд фаъол бошанд, ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои истиқлолро ҳифз кунанд, амнияти давлат ва шарафи Ватанро ҳимоя намуда, парчамбардори ин сарзамин ва давлати муқаддас бошанд.

Зимнан ёдовар мешавем, ки роҳбарияти Бонки миллии Тоҷикистон дар ҳама маҳфилу чорабиниҳое, ки баргузор мегарданд, ҳамеша ҷавононро даъват мекунанд, ки аз таъсири мафкураи бегонапарастӣ ва ифротгароӣ канораҷӯйӣ карда, бо ҳисси баланди миллӣ ва худогоҳӣ барои шукуфоии сарзамини худ хизмат намоянд.

Имрӯз мутахассисони ҷавони аз илму донишҳои замонавӣ бохабар дар низоми бонкӣ зиёд фаъолият доранд. Саҳми онҳо дар муаррифию пешниҳоди маҳсулоти инноватсионии молиявӣ, аз қабили пардохтҳои мобилӣ, ҳамёнҳои рақамӣ, платформаҳои сармоягузорӣ ва дар маҷмуъ рақамикунонии иқтисодиёт муҳим арзёбӣ мегардад.

Тавре Президенти Тоҷикистон дар Паём ба Маҷлиси Олӣ «Дар бораи самтҳои асосии сиёсати дохилӣ ва хориҷии ҷумҳурӣ» иброз намуданд, зарур аст, ки ташаббусҳои созандаи ҷавонон минбаъд низ ҳамаҷониба дастгирӣ карда шаванд. Аз ин рӯ, ташкилоти қарзии молиявиро зарур аст, ки бо мақсади пешбурду татбиқи навовариҳо барои ҷавонон шароити мусоид эҷод кунанд, зеро дастгирии ҷавонон метавонад ба ҳалли мушкилоти иҷтимоӣ ва рушди устувори тамоми соҳаҳо, аз ҷумла низоми бонкӣ мусоидат намояд.

Гуфта шуд, ки давоми солҳои соҳибистиқлолии мамлакат барои баланд бардоштани нақши ҷавонон дар ҷомеа якчанд барномаҳои давлатӣ ва санадҳои меъёрии ҳуқуқӣ, аз ҷумла «Стратегияи сиёсати давлатии ҷавонон дар Ҷумҳурии Тоҷикистон», «Барномаи рушди саломатии ҷавонон дар Ҷумҳурии Тоҷикистон» ва Қонуни Ҷумҳурии Тоҷикистон «Дар бораи ҷавонон ва сиёсати ҷавонони Тоҷикистон» қабул гардиданд, ки ин ҳама бозгӯи таваҷҷуҳи махсуси Роҳбари давлат нисбат ба ҷавонон мебошад.

Дар ҳамоиш вобаста ба мавзуъҳои «Муҳиммияти саводнокии молиявӣ барои ҷавонон», «Нақши ҶСК «Алиф Бонк» дар пешрафти касбии ҷавонон», «Душанбе Сити Бонк – ҳамқадами ҷавонон дар рушди молиявӣ», «Дастгирии ҷавонони мамлакат дар доираи иқдоми гуногун дар меҳвари таваҷҷуҳи Бонки сармоягузорӣ ва қарзии Тоҷикистон» рӯнамоҳо пешниҳод гардиданд.

Дар фарҷоми ҳамоиш ҷавонони фаъол ва пешоҳанги бархе ташкилоти қарзии молиявӣ аз ҷониби ташаббускорони чорабинӣ бо Сипоснома ва туҳфаҳои хотиравӣ қадрдонӣ шуданд. Инчунин намоиши маҳсулоти бонкӣ ва дастовардҳои ташкилоти қарзии молиявӣ ташкил ва ба иштирокдорон вобаста ба хизматрасонии молиявӣ маълумот пешниҳод гардид.

АКС: Бонки миллии Тоҷикистон