Дар хатсайри Душанбе — Панҷакент нахустин парвози ҳавопаймои «Тоҷик Эйр» амалӣ гардид

ДУШАНБЕ, 25.01.2025 /АМИТ «Ховар»/. 24 январ дар хатсайри Душанбе–Панҷакент аз ҷониби  ширкати ҳавопаймоии «Тоҷик Эйр» нахустин парвоз амалӣ гардид, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент.

Дар масири  Душанбе-Панҷакент ҳавопаймои АН-28 парвоз намуда, 17 мусофир давоми 40-45 дақиқа  ба Панҷакент расонида шуданд.

Қаблан ширкати ҳавопаймоии «Тоҷик Эйр» иттилоъ дода буд, ки парвози аввалини ҳавопаймо дар хатсайри Душанбе–Панҷакент 14 январ фаъол гардонида мешавад. Аммо бо сабаби номусоидии   ҳаво парвоз ба таъхир гузошта шуд.

Нархи чипта дар масири  Душанбе-Панҷакент 400 сомонӣ буда, парвоз 40-45 дақиқа давом меёбад. Парвоз дар масири  Душанбе-Панҷакент ҳафтае се маротиба- рӯзҳои сешанбе, панҷшанбе ва якшанбе бо мусоид омадани ҳаво анҷом дода мешавад.

 АКС аз манбаъҳои боз