Дар Тоҷикистон скутерҳо ба қайд гирифта шуда, бо рақами давлатӣ таъмин карда мешаванд

ДУШАНБЕ, 17.01.2025 /АМИТ «Ховар»/. Шуруъ аз моҳи январи соли 2025 ронандагони воситаҳои нақлиёти Тоҷикистонро якчанд тағйирот интизоранд, аз ҷумла, скутерҳо ба таври ҳатмӣ ба қайд гирифта мешаванд. Соҳибони скутерҳо бояд воситаи нақлиёти худро дар қайд гузошта, рақами давлатӣ бигиранд, иттилоъ медиҳад АМИТ «Ховар» бо истинод ба Вазорати нақлиёти Ҷумҳурии Тоҷикистон.

Тавре масъулин иброз доштанд, ин амал барои пешгирии садамаҳои эҳтимолӣ ва баҳисобгирии нақлиёт дар мамлакат зарур аст. Агар суръати скутерҳо аз 40 км/соат зиёд бошад ва ҳаҷми муҳаррик 50 кубро ташкил диҳад, онҳоро ба қайд гирифтан зарур аст.

Инчунин тамоми воситаҳои нақлиёт дар Тоҷикистон бояд соле як маротиба аз муоинаи техникӣ гузаранд. Дар ҳолати мавҷуд набудани ҳуҷҷатҳо дар бораи гузаштан аз санҷиш ё сари вақт нагузаштани он нисбат ба ронанда ҷарима таъйин шуда, истифодаи минбаъдаи мошин дар роҳҳои Тоҷикистон манъ карда мешавад.

АКС аз манбаъҳои боз