Хадамоти алоқа: «Барои дастрасӣ ба шабакаи баландсуръати интернет дар Тоҷикистон 798 стансияҳои базавӣ насб карда шуданд»

ДУШАНБЕ, 29.01.2025 /АМИТ «Ховар»/. Барои дар амал татбиқ намудани Фармони Президенти Ҷумҳурии Тоҷикистон «Дар бораи вусъат додани ҳисоббаробаркунии ғайринақдӣ» соли 2024 798 стансияҳои базавӣ насб карда шуданд. Ҳамчунин зиёда аз 300 километр хати нахи нурӣ барои вусъат бахшидани фаъолияти мунтазами стансияҳои базавӣ ва дастрасӣ ба шабакаи баландсуръати интернет насб гардид. Ин матлабро имрӯз, 29 январ сардори Хадамоти алоқаи назди Ҳукумати Ҷумҳурии Тоҷикистон Исфандиёри Саъдулло дар нишасти матбуотии ин ниҳод баён намуд.

Сардори Хадамоти алоқа инчунин гуфт, ки аз ҷониби ширкатҳои мобилӣ мошинҳои махсуси алоқаи сайёр ба истифода дода шуда, замимаҳои бонкинги мобилӣ дар смартфонҳо ба кор дароварда шуданд.

Дар нишасти матбуотӣ иттилоъ дода шуд, ки дар Тоҷикистон шумораи истифодабарандагони интернет дар якҷоягӣ бо истифодабарандагони интернети мобилӣ ва собит 4,5 миллион нафарро ташкил медиҳад.

«Дар Ҷумҳурии Тоҷикистон шумораи умумии муштариёни ба шабакаҳои алоқаи барқӣ пайвастшуда баъди дар амал татбиқ намудани Қарори Ҳукумати Ҷумҳурии Тоҷикистон «Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он» 8 миллион нафарро ташкил дод, ки зиёда аз 5 миллиони он муштариёни фаъол мебошанд»,-изҳор гардид дар нишаст.

Моҳинави НАВРӮЗ,
АМИТ «Ховар»

АКС: АМИТ «Ховар»