Соли 2025 барои муассисаҳои таҳсилоти ибтидоӣ ва миёнаи касбӣ «Соли таъмини сифати таҳсилот» эълон гардид

ДУШАНБЕ, 13.01.2024 /АМИТ «Ховар»/. Дар ҷаласаи Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, ки 10 январ баргузор шуд, нуктаҳои асосии Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» мавриди баррасӣ қарор дода шуданд.

Тавре ба АМИТ «Ховар» дар  Кумита оид ба таҳсилоти ибтидоӣ ва миёнаи касбӣ иттилоъ доданд, дар ҷаласа вазъи соҳаи таҳсилоти ибтидоӣ, миёнаи касбӣ ва фаъолияти муассисаҳои соҳа, таҳия ва нашри китобҳои дарсӣ, дастурҳои таълимӣ, таъмини базаҳои моддию техникии муассисаҳо бо дастгоҳу таҷҳизоти замонавӣ, бунёду таъмири муассисаҳои таҳсилоти ибтидоӣ ва миёнаи касбӣ, таҷдиди назар намудани нақшаҳои таълимӣ, таъмини иштироки хонандагону донишҷӯён ва кормандону омӯзгорон дар озмунҳои ҷумҳуриявӣ ва дигар масъалаҳои марбут ба таҳсилоти ибтидоӣ ва миёнаи касбӣ баррасӣ гардид.

Раиси Кумита оид ба таҳсилоти ибтидоӣ ва миёнаи касбӣ Фарҳод Раҳимӣ доир ба нуктаҳои асосии Паёми Президенти Тоҷикистон ба Маҷлиси Олӣ дар мавриди таваҷҷуҳ ба касбомӯзӣ ва бозомӯзии шаҳрвандони бекор, додани шаҳодатнома ба малакаҳои касбӣ ва ташкили машғулияти касбомӯзӣ ва шуғли пурмаҳсул ибрози андеша намуд.

Таъкид гардид, ки имрӯз тавассути муассисаҳои таҳсилоти ибтидоӣ ва миёнаи касбӣ шаҳрвандони бекор ва бешуғл ба тайёрии касбӣ, такмили ихтисос, бозомӯзӣ ва машғулияти кӯтоҳмуддат фаро гирифта шуда, корҳо дар ин самт боз ҳам тақвият дода мешаванд.

Ҳоло дар назди Кумита оид ба таҳсилоти ибтидоӣ ва миёнаи касбӣ 63 муассисаи таҳсилоти ибтидоии касбӣ, 87 муассисаи таҳсилоти миёнаи касбӣ  ва 5 филиал  фаъолият менамоянд, ки дар онҳо аз рўйи зиёда аз 500 ихтисос мутахассисон омода карда мешаванд.

Фарҳод Раҳимӣ пешниҳод намуд, ки соли 2025 Соли таъмини сифати таҳсилот эълон гардида, муассисаҳо барои баланд бардоштани нишондиҳандаҳои сифати таҳсил саъю талош намоянд.

Дар ҷаласа роҷеъ ба мушкилоту дастовардҳои соҳаҳои таҳсилоти ибтидоӣ ва миёнаи касбӣ ибрози назар карда шуд. Гуфта шуд, ки муассисаҳои таҳсилоти ибтидоӣ ва миёнаи касбӣ барои ба касбомӯзӣ фаро гирифтани шаҳрвандон дар байни аҳолии ҷумҳурӣ корҳои таблиғотиву ташвиқотӣ гузаронанд. Ба сифати тайёр кардани кадрҳо диққати аввалиндараҷа дода шуда, барои бо ҷойи кори доимӣ таъмин намудани онҳо ҳамкорӣ бо корфармоён бояд тақвият ёбад. Зеро ин нишондиҳандаҳо омили асосии фарогирии аҳолии ҷумҳурӣ ба омӯзиши касбу ҳунар ба ҳисоб мераванд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон