Таҳкими ҳамкорӣ дар соҳаи кӯҳкорӣ байни Тоҷикистон ва Саксония баррасӣ шуд

ДУШАНБЕ, 24.01.2025 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Олмон Имомудин Сатторов дар шаҳри Фрайберг бо Роҳбари Хадамоти назорати коркарди маъданҳои кӯҳӣ дар музофоти Саксония Бернҳард Крамер мулоқот анҷом дод.

Тавре АМИТ «Ховар» бо истинод ба Сафорати Ҷумҳурии Тоҷикистон дар Олмон хабар медиҳад, дар ҷараёни суҳбат ҷонибҳо масъалаҳои ҳамкории дуҷонибаи Тоҷикистон ва Саксонияро дар соҳаи кӯҳкорӣ мавриди баррасӣ қарор доданд.

Ҳамчунин Сафири Тоҷикистон бо проректори Академияи саноати кӯҳии Донишгоҳи техникии Фрайберг (TUBAF), профессор, доктор Тобиас Фибек мулоқот намуд.

Ҷонибҳо роҷеъ ба таҳкими равобити байнидонишгоҳӣ дар анҷом додани корҳои илмӣ-таҳқиқотӣ ва амалинамоии иқдоми муштарак барои таҳсили донишҷӯёни Тоҷикистон дар ин муассисаи илмӣ ба мувофиқа расиданд.

АКС: Сафорати Ҷумҳурии Тоҷикистон дар Олмон