Дар Душанбе масъалаи густариши ҳамкории иқтисодӣ ва тиҷоратӣ байни Тоҷикистон ва Эфиопия баррасӣ шуд

ДУШАНБЕ, 22.02.2025. /АМИТ «Ховар»/. 21 феврал Вазири рушди иқтисод ва савдои Ҷумҳурии Тоҷикистон Завқӣ Завқизода бо Сафири Фавқулода ва Мухтори Ҷумҳурии Федеративии Демократии Эфиопия бо қароргоҳ дар шаҳри Исломобод Ҷамол Боқир Абдулло вохӯрӣ  намуд, ки зимни он ҷонибҳо масъалаи густариши ҳамкории иқтисодӣ ва тиҷоратиро мавриди баррасӣ қарор доданд. Дар ин хусус АМИТ «Ховар» бо истинод ба Вазорати рушди иқтисод ва савдо хабар медиҳад.

Дар ҷараёни вохӯрӣ ҷонибҳо ба рушди муносибатҳои дуҷониба таваҷҷуҳ зоҳир намуда, зарурати таҳкими равобит дар бахшҳои афзалиятнокро таъкид намуданд.

Дар баробари ин Завқӣ Завқизода иброз намуд, ки бо назардошти иқтидори ҳарду давлат дар соҳаи энергияи барқароршаванда, кишоварзӣ ва саноат имконияти ҳамкорӣ дар самти таҳияи лоиҳаҳои муштарак, рушди технологияҳои обёрӣ ва истифодаи манбаъҳои барқароршавандаи энергия мавҷуд мебошад.

Вобаста ба ин ҷонибҳо масъалаҳои рушди тиҷорати дуҷониба ва ҷалби сармоягузориро баррасӣ намуда, тавсеаи ҳамкории иқтисодиро омили асосии афзоиши имконияти тиҷоратӣ ва саноатӣ донистанд.

Дар анҷоми вохӯрӣ ҷонибҳо барои таҳкими ҳамкории иқтисодӣ, татбиқи лоиҳаҳои муштарак ва тавсеаи робитаҳо дар бахшҳои мухталиф изҳори ҳавасмандӣ намуданд.

АКС: Вазорати рушди иқтисод ва савдои Ҷумҳурии Тоҷикистон