Дар Хуҷанд дурнамои тақвияти ҳамкории гуногунсоҳаи Тоҷикистон бо Олмон ва Фаронса баррасӣ шуд

ДУШАНБЕ, 25.02.2025 /АМИТ «Ховар»/. Соҳибкорону сармоягузорон аз Олмон ва Фаронса метавонанд дар амалӣ шудани лоиҳаҳо ва нақшаҳои созанда  дар вилояти Суғд саҳми муносиб гузоранд, зеро дар вилоят фазои муносиби сармоягузорӣ фароҳам оварда шуда, бунёди корхонаҳои муштарак бо истифода аз таҷрибаи пешрафта ва технологияи муосир ба нафъи ҷонибҳо мебошад. Чунин гуфта шуд зимни мулоқоти Раиси вилояти Суғд Раҷаббой Аҳмадзода бо Сафири Фавқулода ва Мухтори Ҷумҳурии Федеративии Олмон дар Ҷумҳурии Тоҷикистон Йорк Шугарф ва Сафири Фавқулода ва Мухтори Ҷумҳурии Фаронса дар Ҷумҳурии Тоҷикистон хонум Элза Пинёл, ки дар шаҳри Хуҷанд баргузор гардид.

АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад, ки   дар  мулоқот ҷонибҳо аз ҳамкории судманди Тоҷикистон бо Олмон ва Фаронса изҳори қаноатмандӣ намуданд.

Таъкид  шуд, ки дар доираи сиёсати дурнигаронаи сарони давлатҳо зарфияти мавҷудаи соҳаҳои саноату энергетика, кишоварзӣ, илму маориф, сайёҳӣ ва дигар соҳаҳои муҳим мақсаднок истифода гардида, ҳамкорӣ тақвият бахшида мешавад.

Дар мулоқот вобаста ба рушди соҳаи саноат, бунёди корхонаҳои саноатӣ, имконияти соҳа, кишоварзӣ ва бахши сайёҳии вилояти Суғд  маълумот дода шуд. Инчунин масъалаи тавсеаи ҳамкорӣ дар соҳаи илму маориф баррасӣ шуда, барои густариши равобити илмӣ изҳори омодагӣ карда шуд.

АКС: Хадамоти матбуоти Раиси вилояти Суғд