Дар ноҳияи Қубодиён бинои шуъбаи бемориҳои сироятӣ ба истифода дода шуд

ДУШАНБЕ, 12.02.2025. /АМИТ «Ховар»/. Дар Муассисаи давлатии «Маҷмааи тандурустии дӯстии Тоҷикистону Узбекистон», воқеъ дар ноҳияи Қубодиёни вилояти Хатлон бинои шуъбаи бемориҳои сироятии калонсолон ва кӯдакон мавриди истифода қарор дода шуд. Дар ин хусус ба АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ доданд.

Бинои шуъбаи бемориҳои сироятии Муассисаи давлатии «Маҷмааи тандурустии дӯстии Тоҷикистону Узбекистон» аз 50 кат, аз ҷумла 30 кат барои калонсолон ва 20 кат барои кӯдакон иборат буда, бо хати оксиген таъмин карда шудааст. Дар он бахши озмоишгоҳ низ фаъолият менамояд, ки дорои тамоми таҷҳизоту лавозимоти муосир дар самти ташхиси бемориҳои гуногун мебошад.

Муассисаи давлатии «Маҷмааи тандурустии дӯстии Тоҷикистону Узбекистон» дар ноҳияи Қубодиён яке аз калонтарин муассисаҳои тандурустӣ  дар ҷумҳурӣ дониста мешавад. Он  соли 2021 ба тариқи маҷозӣ аз ҷониби Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Узбекистон муҳтарам Шавкат Мирзиёев мавриди истифода қарор гирифта буд.

 АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон