Дар ноҳияи Ёвон 105 муассисаи тиббӣ ба аҳолӣ хизмат мерасонад

ДУШАНБЕ, 04.02.2025 /АМИТ «Ховар»/. Дар ноҳияи Ёвон то имрӯз 105 муассиса, аз ҷумла 100 муассисаи давлатӣ ва 5 муассисаи хусусӣ бо 1981 табибу мутахассис фаъолият дошта, ба аҳолӣ хизмати тиббӣ мерасонанд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Ёвон хабар медиҳад.

Тавре иттилоъ дода шуд, имрӯз иҷрокунандаи вазифаи Раиси ноҳияи Ёвон Икромиддин Вализода бо вазъи муассисаҳои тандурустӣ ва хизматрасонии тиббӣ ба сокинон дар беморхонаи марказии ноҳия шинос шуд.

Икромиддин Вализода зимни шиносоӣ бо фаъолияти якчанд шуъбаи беморхона бо мутахассисону кормандони беморхонаи марказӣ суҳбат кард. Таъкид шуд, ки табибон- дармонбахшандагони мардум бояд ба беморону шахсони муроҷиаткунанда бо муоширати ҳалимона хизмати софдилона расонанд.

Роҳбарияти Мақомоти иҷроияи ҳокимияти давлатии ноҳияи Ёвон бо истифода аз тамоми имконият кӯшиш ба харҷ медиҳанд, ки барои рушди инфрасохтори ин соҳаи муҳим ва баланд бардоштани сатҳу сифати хизматрасонии тиббӣ тадбирҳои муассир андешанд.

АКС: Мақомоти иҷроияи ҳокимияти давлатии ноҳияи Ёвон